На денешното судско рочиште за набавката на мерцедесот од 600.000 евра, познат како „Тенк“ се сослушуваат сведоци.

Во судницата се екс премиерот Никола Груевски и поранешната министерка Гордана Јанкулоска.

Првиот сведок Киро Тодоровски, вработен во Агенцијата за разузнавање, истакна дека во 2012 година кога бил набавен „мерцедесот“ работел во МВР како советник за човечки ресурси во кабинетот на тогашната министерка Јанкулоска. Тој истакна дека тогаш добил решение дека е член на Комисијата за набавка на блиндираното возило.

Тој пред рече дека во постапката за набавката на мерцедесот имало само еден учесник, дека не учествувал во подготвување на тендерската документација, туку во избор на најповолен понудувач.

Тодоровски во судот изјави дека лично смета дека комисијата во која членувал ги има запазено сите законски процедури, од објавување на огласот до изборот согласно потребните спецификации. Тој  е исто така веќе обвинет и во случајот „Титаник“, за изборни нерегуларности, а сега е вработен во Агенцијата за разузнавање.

Обвинителството и одбраната еден час правно се докажуваа околу тоа дали одбраната може да постави директни прашања до сведокот Тодоровски, кој е предложен од СЈО.

Обвинителот Гаврил Бубевски истакна дека одбраната не може да поставува директни прашања, бидејки СЈО го немаат неговиот исказ, за да можеле да се подготват, нешто што е пракса кога станува збор за сведоците на обвинителството, односно обвинетите и адвокатите знаат што изјавил за време на истрагата.

Според обвинетата Јанкулоска, неговото сведочење е клучно.

-Неговото сведочење може да биде клучно за побивање на тезата на обвинителниот акт. Треба да одговори на две околности, на потребата од набавката на ваков тип на возило и начинот на користење на возилото од МВР. Одговорот на овие прашања е потребен за да може судот да донесе правилна одлука. речеЈанкулоска.

На почетокот на судското рочиште Тодоровски рече дека  може да има класифицирани информации и побара јавноста да биде исклучена, но судот дозволи новинарите да останат во судницата.

Според обвинението, во периодот од февруари до крајот на октомври 2012 година Никола Груевски како службено лице ги искористил влијанието и службената положба и побарал од министерката за внатрешни работи Гордана Јанкулоска, да спроведе јавна набавка во која Министерството ќе купи ново блиндирано патничко моторно возило „мерцедес“, модел „С-600 гард“, а во постапката бил фаворизиран економскиот оператор Мак Аутостар ДООЕЛ, генерален застапник и дистрибутер на возилата од брендот „Мерцедес“.

Јанкулоска за да го исполни барањето, пак, го поттикнала обвинетиот помошник-министер Ѓоко Поповски да стори кривично дело злоупотреба на службената положба и овластувањето. Возилото од Министерството требало да се даде на користење и на Груевски кој сакал да користи такво ново блиндирано патничко моторно возило, но за тоа не сакал во јавноста да се дознае.

За набавката на мерцедесот јавноста дозна од  разговорите кои ги објави опозицијата.

Владата одлучи да ја запре постапката за лицитација на мерцедесот, за да се спречи било каква можност обвинетите во случајот „Тенк“ на СЈО да се обидат да избегнат одговорност.