Сведокот Дејан Трајковиќ на денешното рочиште за случајот „Еразмус“ наведе дека професорот Бобек Шуклев барал да има сексуални односи или да добие 1.000 евра за да и даде оценка на студентка на Економскиот факултет.
Трајковиќ, кој од 2012 година од 2018 година бил вработен во бифето на Економскиот факултет, посочи дека две студентки, го прашале дали може да им „среди“ за оценка. Сведокот го прашал Шуклев, а тој му рекол да и каже на студентката дека сака да има сексуални односи со неа или таа да плати 1.000 евра. Трајковиќ и пренел и таа одбила да има секс со професорот, но рекла дека ќе плати. Откако му било пренесено што одговорила, Шуклев рекол „би сакал да имам секс со неа бидејќи е многу убава, но нека си плати“.
По некое време, двете студентки, од кои, како што опиша сведокот, „едната била бремена, а другата имала црна коса“, повторно го прашале дали има шанси да посредува и за оценка кај други професори. Демонстраторот Драган Денковски му кажал на Трајковиќ дека може да заврши работа за студенти да добијат оценка кај повеќе професори, меѓу кои Драги Јанев, Славе Ристески, Шуклев и други. Денковски му ги кажал тарифите за плаќање за оценка кај професорите. Сумите се движеле од 500 до 1000 евра.
Двете студентки прифатиле да платат и тие му дале пари и индекси на Трајковиќ за тој да му ги предаде на Денковски. По некое време сведокот ги видел оценките во индексите на девојките, за кои тие платиле.
Следното рочиште за случајот „Еразмус“ е закажано за 23 декември. Обвинителството ги товари обвинетите врз основа на докази што го потврдуваат основаното сомневање дека во повеќе наврати во текот на 2015 и 2016 година, искористувајќи ја својата положба, сториле кривични дела. Јавното Обвинителство, пак, пред три години побара отстранување на професорите од работните места.
Осомничените професори, меѓу кои и Шуклев, со часови беа претресувани по што се појавија на распит кај судија на претходна постапка. Тогаш Обвинителството за организиран криминал и корупција побара Судот да забрани работни активности на осомничените професори во акцијата „Еразмус“, за, како што рекоа оттаму, да се превенираат состојби што можат да го попречат нормалното водење на кривичната постапка.
Обвинетите Шуклев и Ристески се товарат за примање поткуп и примање награда за противзаконито влијание, Љ.Ј. и С.Д. за злоупотреба на службената положба и овластување, а Денковски за давање поткуп. Основен суд Скопје 1 на обвинетите им издаде забрана да држат предавања и други работни активности поврзани со кривичното дело за кое се товарат.