Ремзие Бислимова, како клучен сведок во случајот „Титаник 3“, денеска сведочеше во Кривичниот суд во Скопје преку конференциска врска од суд во Германија каде моментно живее и работи. Обвинението во предметот е против Ејуп Алими и Исмет Гури кои се сомничат за сторени нерегуларности за време на локалните избори во 2013 година, поточно за земање на записниците од гласањето. Алими е висок функционер во Демократската Унија за Интеграција (ДУИ) и беше координатор на пратеничката група во последниот парламентарен состав. Случајот го води судијката Марија Клетничка, застапници на обвинението се обвинителите Фатиме Фетаи и Гаврил Бубевски.
Бислимова, која била член на Изборната Комисија во Чаир, под заклетва и со обезбеден судски преведувач даде исказ за случувањата во просторијата за статистика вечерта по гласањето.
Тек на сведочењето
Фетаи: Дали во просторијата за статистика каде што бевте вие и колешката Нериман, влезе уште некој по завршување на гласањето?
Фетаи: Дали влезе уште некој друг?
Бислимова: Да, влегоа Ејуп Алими и Исмет Гури. Влезе и претседателот на Изборната комисија да провери како оди работата
Фетаи: Што правеа Ејуп Алими и Исмет Гури во канцеларијата и какви дејства презедоа?
Бислимова: Тие неколку пати влегоа и излегоа. Секогаш беа заедно. Прашаа „дали овде може да се направат далавери?“ – Ние двете им кажавме дека далавери нема да правиме ни за нашите родители“
За овој исказ на Бислимова, судскиот преведувач, Албанка најпрво преведе дека „кога Алими влегол во забранетата соба наводно прашал „дали овде има далавери“ на што реагираше обвинителката Фатиме Фетаи со барање до преведувачката да даде точен превод. Сведок трипати повтори дека „Алими и Гури ја прашале неа и колешката „дали овде може да се направат далавери“, а не „дали има далавери“ како што упорно преведуваше судската преведувачка. И судијката Клетничка ѝ укажа на преведувачката да преведува точно, а адвокатот на Гури ѝ рече на Фетаи „да не се меша во преводот“. Преведувачката, сепак, потврди дека забелешката на Фетаи е на место по што продолжи сослушувањето.
Фетаи: Што се случи откако вие и Нериман им кажавте дека одбивате да правите далавери?
Бислимова: Откако им го кажавме тоа, по некое време Ејуп Алими зема дел од записниците и ги сокри во градите. Не се сеќавам во што беше облечен
Фетаи: Како вие реагиравте на тоа?
Бислимова: Бев многу исплашена и не реагирав никако
Фетаи: Што се случи потоа?
Бислимова: По некое време се вратија во канцеларијата и ги донесоа записниците што ги зедоа. Ништо не кажав, зашто беа силни во партијата
Фетаи: Што се случи со записниците?
Бислимова: Ги внесов во системот
По денешното рочиште за „Титаник 3“ и сведочењето на Ремзие Бислимова ќе следуваат завршни зборови и пресуда.