Сведокот за случајот „Труст“, Феим Имери од Сарај, сопственик на фирма за продажба и сервис на градежни машини, во исказот пред судот на рочиштето за незаконскиот тендер за ископ на јаглен во РЕК Битола, рече дека фактурите што се предочуваат се негови, како и меморандумот, но не е сигурен за личниот потпис, бидејќи, како што рече, низ годините ги менувал потписите. Забележа зошто не е повикан со книговодителот на неговата фирма за полесно да сведочи за документацијата.
СЈО во судница на газдата на „Фичо сервис“ му предочи договори за продажба на багери, лифкери, гасеничари и го праша дали неговата фирма навистина ја продала опремата наведена во договорот и дали „Трансмет“ е купувачот.
Станува збор за фактури кои „Трансмет“ на Кочан ги навел во тендерската документација за која СЈО вели дека има фалсификувани документи за поседување градежна механизација и чии ориганали СЈО не можело да ги пронајде во фирмата на сведокот.
Сведокот потврди дека работи со фирмата Трансмет од 1991 година.
Сведокот пред судот одговара на прашања на обвинителите во врска со тоа, дали машините биле продадени или не. Во случајот „Труст“ обвинет е бизнисменот Сеад Кочан и уште две лица, Василие Авировиќ и Сафет Ватиќ, кои се присутни на денешното рочиште.