Стратегијата на Европската унија за Западен Балкан уште еднаш ја подвлече важноста на регионалната соработка и добрососедските односи како главен елемент за напредокот на земјите кон нивниот европски пат, изјави денеска генералниот секретар на Регионалниот совет за соработка (РСС) Горан Свилановиќ.
-Клучните промени мораат да дојдат од нас, од регионот, бидејќи ние сме творци на нашата сопствена иднина. Нашата задача е веднаш да го искористиме овој позитивен потстрек, настојувајќи да ги решиме билатералните и мултилатералните спорови и уште поинтензивно да работиме на развојот на нашиот регион, се наведува во писмената изјава на Свилановиќ што ја дистрибуираше РСС.
Со Стратегијата на ЕУ се предвидува постојните спогодби и обврски на земјите од Западен Балкан станат оперативни, пред се преку примената на Повеќегодишниот акциски план за развој на економскиот простор што го подготви РСС, а кој беше усогласен и прифатен од лидерите на земјите на самитот во Трст во јули 2017 година. Во изјавата се додава дека РСС ќе продолжи да ги подржува земјите од регионот во нивните настојувања и дека ќе настојува активностите што се договорени со владите од регионот да се спроведуваат.
РСС е оперативно тело на Процесот за соработка во Југоисточна Европа, чиј основач и полноправен член е и Република Македонија. РСС на самитот во Трст меѓу ЕУ и Западен Балкан доби значителна улога во координација и спроведување на регионалната интеграција и поттикнување на економиите во секој поглед.