Сопственикот на Лестер, Вичај Шриваданапраба се наоѓал во хеликоптерот што се урнал синоќа околу 21.30 часот во близина на стадионот „Кинг Пауер по мечот на „лисиците“ против Вест Хем (1:1) во 10. коло во англиската Премиерлига. Веста, покрај „Скај спорт“, ја пренесе и „Би-Би-Си“ кој се повикува на извори блиски на семејството на тајландскиот милијардер. Леталото, како што пишуваат медиумите на Островот, се подигнало нормално, достигнало височина од 200 стапки (околу 60-70 метри) по што одеднаш почнало да паѓа и за неколку секунди се претворило во огнена топка.
Покрај Шриваданапраба, меѓу патниците била и една од неговите ќерки, двајца пилоти и уште едно лице кое сè уште не е идентификувано. Трагичниот настан собра голем број на навивачи пред стадионот кои палат свеќи, положуваат цвеќиња и клупски обележја пред објектот. И компанијата „Кинг Пауер“ што е сопственост на Тајланѓанецот потврди дека тој бил во леталото, но не и дека загинал.
„Во целост соработуваме со полицијата и со итната служба по несреќата што се случи на „Кинг Пауер“ стадионот. Клубот ќе излезе со детално соопштеное што се добие потврда на поедини информации“, стои во соопштението на англискиот фудбалски шампион од сезоната 2015/16.
Во моментот на несреќата на стадионот бил само голманот Каспер Шмајхел. Сведоци, според поедини медиуми, тврдат дека при експлозијата, истрчал кон местото на падот на хеликоптерот, но било доцна да помогне некому. Данскиот чувар на мрежата на „лисиците“ одеднаш застанал пред остатоците од леталото што било во пламен, се држел за глава и потонал во плач од ужасната глетка.
Сведок на трагедијата беше и легендарниот англиски голман Петер Шилтон. Неговата сопруга Стефани (50) за медиумите изјави:
„Во шок сме од глетката што нè затекна на пат кон дома. Се случи токму пред нас, откако го напуштавме стадионот. Не знаеме што се случи, но беше стравично“.
Шриваданапраба доаѓал со хеликоптер на секој натпревар на Лестер, а потоа на идентичен начин се враќал во Лондон. Како неофицијални причини за несреќата засега се споменуваат проблем со моторот. Тајландскиот бизнизмен го купи Лестер во 2010 година за 33 милиони евра. Набрзо потоа се претвори во омилен лик во градот поради успешниот проект со кој „лисиците“ се вратија во Премиерлигата во 2014 година. Две години подоцна беа и сензационални освојувачи на шампионската титула под водство на Клаудио Раниери. Според магазинот „Форбс“, Шриваданапраба е петти најбогат човек на Тајланд и неговото богатство се проценува на 4,9 милијарди долари.