Во делови од Кина на сила е предупредување од обилни дождови и силни ветришта од тајфунот Мангхут кој пристигна на јужниот брег.
Илјадници луѓе се евакуирани од Гуангдонг, на кинеското копно, каде што Мангхут треба да пристигне во подоцна денеска
Властите во оваа густо населена провинција, исто така, издадоа највисоко ниво на предупредување.
Тајфунот е 22 по ред оваа година, но кинескиот Национален метеоролошки центар вели дека би можел да биде најсилниот досега.
Филипини
Најмалку 30 лица загинаа на Филипините, но се уште не се познати крајните штети во руралните средини поради блокираните патишта и прекинот во комуникациите.
Повеќето од загинатите се како последица на лизгање на земјиштето во регионите Кордилера и Нуева Вискаја, велат официјалните претставници.
Меѓу загинатите има и деца.
Пет милиони луѓе ги напуштиле домовите, а повеќе од 100.000 се засолниле во привремени центри.
Исто така, постои загриженост во врска со тоа колкави се економските штети што ги предизвика тајфунот на обработливото земјиште во Кагајан, клучна земјоделска провинција.
Френсис Толентино, политички советник на претседателот Родриго Дутерте, изјави за Би-Би-Си дека проценува дека само една петтина од продуктите таму биле претходно собрани.
Филипините често се погодени од тајфуни, но силата на Мангхук ги врати сеќавањата на најсмртоносната бура – “Супер тајфунот Хаијан”, во кој загинаа повеќе од 7.000 во 2013 година.
Но, оттогаш, процедурите за подготовка и за евакуација се подобрени-беа издадени предупредувања, движењето беше ограничено, училиштата беа затворени и војската беше во состојба на готовност.
Хонг Конг
Повеќе од 100 лица се повредени во Хонг Конг, каде што силниот ветер предизвика сериозни штети.
Тамошните власти ги предупредија жителите да останат во затворени простории, бидејќи ветрот корнел покриви и прозорци. Наводно, тој бил со брзина повеќе од 110 километри на час.
Нивото на водата порасна за речиси 3,5 метри, а на некои места по улиците пливале риби.
Според официјалните претставници бројот на повредени е 111, а медиумите известуваат дека најлошото поминало.
Повеќето продавници и јавни служби беа затворени, а повеќе од 800 летови беа откажани на меѓународниот аеродром во Хонг Конг.
Во соседно Макао, за првпат во историјата била издадена наредба да се затворат казината по кои е познато.
Се очекува до вторник тајфунот да ослабне во тропска бура.