Градоначалникот на општина Битола Владимир Талески, верува дека Апелациониот суд ќе донесе одлука за укинување на куќниот притвор, кој тој го издржува како првоосомничен во случајот „Транспортер“ на Специјалното обвинителство .
По денешна јавна седница на Апелација, која траеше околу час и половина, битолскиот градоначалник за медиумите изјави дека е убеден оти набрзо ќе следи расплет на случајот.
-Апсолутно се чувствуваме супериорни затоа што вистината е на наша страна и јас сум убеден дека овие луѓе во Апелација ќе ја согледаат вистината и ќе донесат исправна мерка, така што ценам дека сето ова почнува да добива еден расплет. Јас сум убеден дека за кратко граѓаните ќе видат дека целата ситуација е наместена и ќе повторам, не може од еден телефонски разговор, кој што го водат некои двајца луѓе за некој трет, третиот да биде обвинет за некој прекршок. Јас сум сигурен дека сето ова брзо ќе се расчисти, но да оставиме времето да покаже, рече Талески.
Тој призна дека иако е во притвор, од дома раководи со општината, бидејќи, како што вели освен притворот нема никаква друга забрана.
-Многу пријатно се изненадија моите соработници,затоа што СЈО уште еднаш дојде да провери дали градоначалникот потпишува, се разбира дека потпишувам јас имам мандат и освен мерката куќен притвор немам ниедна друга забрана, рече Талески.
Домашниот притвор за првиот човек на Битола кој беше на двапати продолжен на барање на Специјалното обвинителство истекува а 20 дена, односно на 20 август, а во меѓувреме одбраната на Талески се пожали и до Аплелациониот суд за изречената мерка. Според обраната, тој неосновано повеќе од 60 дена се наоѓа во притвор.
Специјалното обвинителство пак побара Апелација да ја одбие жалбата на одбраната и да го потврди решението за куќен притвор. Одлуката на Апелациониот суд ќе биде соопштена за неколку дена.
Случајот со превозот на учениците, беше споменат и во 19. „бомба“ на опозицијата, во која министерот за финансии Зоран Ставрески во разговор со екс-министерката за внатрешни Гордана Јанкулоска, споменува дека битолскиот градоначалник за превоз на учениците склучил договор „коруптивен до даска“ со цени десет пати повисоки од предвиденото.
Специјалното јавно обвинителство ги товари Талески и уште 22 лица за злоупотреби со превозот на ученици во Битола, тешки 360.000 евра, во случајот „Транспортер“.