Најмалку четири танкери што превезувале руска нафта се запрени покрај брегот на Индија, а индиските рафинерии одбиваат да примат руска нафта, пренесе Блумберг.
Според податоците за следење на бродовите, танкерите „Ахилс“ и „Елит“ моментално се закотвени во близина на градот Џамнагар.
Бродовите примиле товар од Приморск и Уст-Луга кон крајот на јуни, каде што обично се товари руската нафта од Урал, и требало да бидат истоварени на 2 и 3 август.
Танкерите „Ахилс“ и „Елит“ имаат капацитет од околу 700.000 барели и се под санкции од ЕУ и Велика Британија.
Два други танкери, „Дестан“ и „Хорае“ со сурова нафта од Урал, се закотвени покрај индискиот брег. Танкерите биле натоварени помеѓу 24 јуни и 1 јули, според податоците за следење на бродовите.
Се очекува танкерот Дестан, кој исто така е под санкции, да пристигне во пристаништето Сика во наредните денови.
„Хорае“, чија дестинација е сè уште непозната, не е предмет на санкции од ЕУ, Велика Британија или САД. Дестинациите на танкерите можат да се променат.
Индиските државни рафинерии за нафта привремено ги прекинаа купувањата на руска сурова нафта од минатата недела поради намалувањето на попустите на руската сурова нафта и изјавите на американскиот претседател Доналд Трамп во врска со можните санкции.
Иако најголемите купувачи на руска нафта во Индија остануваат приватните компании „Рилианс индустрис“ и „Најара енерџи“, државните рафинерии контролираат повеќе од 60 проценти од капацитетот за рафинирање на нафта во земјата.
Трамп завчера соопшти дека ќе воведе царина од 25 проценти за Индија, почнувајќи од 1 август, наведувајќи ги нејзините купувања на руска нафта како причина за високите давачки.
Американската администрација, исто така, се закани со понеодредени казни за увоз на нафта. Оттогаш, Њу Делхи побара од рафинериите да смислат и да споделат планови за снабдување со сурова нафта од други извори.