Претседателот на Државната комисија за спречување на коруцијата Игор Тантуровски вели дека не чувствува одговорност по наводите објавени во ревизорскиот извештај од УЈП во кој се открива дека антикорупционерите ненаменски трошеле буџетски средства преку исплатата на плати, дневници за службени патувања, но најголеми злоупотреби се во делот на патните трошоци, односно користење приватни возила за службени цели.
Тантуровски оценува дека се прави обид да се изврши притисок врз него и работата на Коомисијата, а повикот од СДСМ да поднесат оставки или ќе бидат разрешени го смета за политички реваншизам.
Пратениците од СДСМ вчера побараа од членовите на Државната комисија за спречување на корупција да си поднесат оставки поради констатираните злоупотреби во ревизорскиот извештај, а доколку тоа не го направат најавија дека ќе покренат собраниска постапка за нивно отповикување.
Претседателот на комисијата за избори и именувања Хари Локвенец очекува антикорупционерите да достават вонреден извештај за нивното работење, вклучувајќи го и т.н. ревизорски извештај за внатрешна употреба преку кој јавноста целосно ќе биде запознаена со се што се случувало во таа институција.
Според порталот СДК.МК, во ревизорскиот извештај од УЈП за работењето на антикорупциската комисија, се констатитало дека антикорупционерите си исплаќале патни трошоци за доаѓање на седници, а исплатата се вршела врз основа на неверодостојни патни налози. Поднесувале три патни налози за ист ден, односно дека член на комисијата истиот ден бил во странство и на седница на комисија, стои во извештајот на ревизијата на Државната комисија за спречување на корупција.
Членовите на Антикорупциска земале пари од буџетот и по основ на поголема искажана километража, односно тие кои не живеат во Скопје покажувале повеќе километри за да стигнат до Скопје. На пример, член на комисијата за секое одење на релација Гостивар-Скопје-Гостивар прикажувал 16 километри повеќе во еден правец.
Покрај овие нерегуларности во ревизорскиот извештај како ненаменско трошење на буџетски пари се посочуваат и трошоци за ручеци и вечери во ресторани кои членови на Комисијата ги правеле при патување во странство, како и трошоци за изнајмување на стан.
По барање на член на антикорупциска, ДКСК носи одлука за исплата на надоместок за стан во износ од 350 евра месечно, односно 250 евра за изнајмување на стан и 100 евра за трошоци.
Членот на Антикорупциска доставил договор за закуп во кој стои дека закупнината изнесува 6.000 денари а за оваа намена му се исплаќани по 250 евра за еден месец.
„Од причина што закупот според договорот изнесува 6.000 денари или 97.5 евра произлегува дека разликата од утврдениот надоместок со одлука на ДКСК и реално направениот расход за закуп претставуваат ненаменски потрошени средства. Со увид во приложената документација се констатира дека исплатата по основ на трошоци за закупнина не е реална, односно по тој основ исплатен е поголем износ од 168.818 денари и истите претставуваат ненаменски потрошени средства“, стои во извештајот на ревизорите од УЈП.