Пратениците од парламентарното мнозинство бараат оставки од членовите на антикорупциската комисија, по скандалозниот извештај на УЈП, во кој се открива дека антикорупционерите ненаменски трошеле буџетски средства преку исплатата на плати, дневници за службени патувања, но најголеми злоупотреби се во делот на патните трошоци, односно користење приватни возила за службени цели. Доколку не поднесат оставки, парламентарното мнозинство ќе покрене постапка за нивно разрешување. .
,, Членовите на ДКСК веќе немаат професионален и етички кредибилитет да ја извршуваат оваа фунција ниту еден ден повеќе. Од тие причини доколку членовите на Антикорупциска не поднесат неотповиклива и итна оставка, Собранието како орган надлежен за избор на членовите на оваа комисија ќе покрене постапка за нивно разрешување, изјави потпретседателката на Собранието и пратеник од СДСМ Фросина Ташевска Ременски.
За ненаменското трошење на буџетските пари во Антикорупциската, предмет отвори основното јавно обвинителство Скопје.
,,По објавите во медиумите, обвинителството презема дејствија за утврдување на фактите во предметот, за прибирање на податоци и на потребната документација од Управата за јавни приходи и други релевантни институции, велат од обвинителството.
Во ревизорскиот извештај од УЈП за работењето на антикорупциската комисија, како што објави порталот „Сакам да кажам“, антикорупционерите си исплаќале патни трошоци за доаѓање на седници, а исплатата се вршела врз основа на неверодостојни патни налози. Поднесувале три патни налози за ист ден, односно дека член на комисијата истиот ден бил во странство и на седница на комисија, стои во извештајот на ревизијата на Државната комисија за спречување на корупција.
Ревизијата се однесува на составот на Комисијата со претседателот Игор Тантуровски и членовите Фарие Алиу, Горан Миленков, Жаклина Дамческа, Најдо Спасевски, Сузана Таскова Аџикотарева и Сејди Халили, кои се на оваа функција од април 2015.
До 2015, на членовите на Антикорупциската комисија не им се исплаќале патни трошоци затоа што надоместок за вработени лица е укинат во 2009 со воведување бруто плата. Еден член на Комисијата се обратил со барање до Комисијата за избори и именувања кога претседател бил Илија Димовски, барајќи да им бидат одобрени патни трошоци според Законот за плати и други надоместоци на избрани и именувани лица. Комисијата на чело со Димовски одлучила дека на антикорупционерите им следуваат патни трошоци, по што ДКСК веднаш им исплатила околу 5.000 евра (330.226 денари) за ретроактивни трошоци.
Членовите на Антикорупциска земале пари од буџетот и по основ на поголема искажана километража, односно тие кои не живеат во Скопје покажувале повеќе километри за да стигнат до Скопје. На пример, член на комисијата за секое одење на релација Гостивар-Скопје-Гостивар прикажувал 16 километри повеќе во еден правец.
Покрај овие нерегуларности во ревизорскиот извештај како ненаменско трошење на буџетски пари се посочуваат и трошоци за ручеци и вечери во ресторани кои членови на Комисијата ги правеле при патување во странство, како и трошоци за изнајмување на стан. По барање на член на антикорупциска за закупнина на стан, ДКСК носи одлука за исплата на надоместок за стан во износ од 350 евра месечно, односно 250 евра за изнајмување на стан и 100 евра за трошоци. Членот на Антикорупциска доставил договор за закуп во кој стои дека закупнината изнесува 6.000 денари, а за оваа намена и натаму му се исплаќани по 250 евра за еден месец.
„Од причина што закупот според договорот изнесува 6.000 денари или 97.5 евра произлегува дека разликата од утврдениот надоместок со одлука на ДКСК и реално направениот расход за закуп претставуваат ненаменски потрошени средства. Со увид во приложената документација се констатира дека исплатата по основ на трошоци за закупнина не е реална, односно по тој основ исплатен е поголем износ од 168.818 денари и истите претставуваат ненаменски потрошени средства“, стои во извештајот на ревизорите од УЈП.
Претседателот на Антикорупциска, Игор Тантуровски денеска не одговораше на повиците од Нова.
Поради исплати на бонуси и дополнителни плати, членовите на Државната изборна комисија, пред три месеци си поднесоа оставки. Според пресметките, секој член на ДИК, добил по повеќе од 10 000 евра. Одлуката да си доделат бонуси ја изгласаа на тајна седница. Дел од нив, ги донираа овие пари.