Пишува: ЈАНЕ ЃОРЃИОСКИ
Со бесмислена егоистичка одлука Арбен Таравари си ја подели партијата и изгуби купишта гласови непосредно пред двојните избори. Таравари ја „продаде кучата“, Села поведе „имотно-правна постапка“, беше првата моја реакција кога слушнав за превирањата во Алијансата за Албанците.
Од позиција на власт, криејќи се позади вечито популистичката реторика „народот бара“ излегува Таравари со објава на Фејсбук и вели: „Верувајќи непоколебливо во моите сопартијци и во нашата заедничка визија, ја барам нивната доверба да Алијансата за Албанците влезе во изборна трка со албанската опозиција и заедно да продолжиме да го правиме најдоброто за оваа земја“.
Да верувал Таравари во сопартијците тие одлуки како претседател на партија ќе си ги решел внатрепартиски, во телата на партијата кои одлучуваат, вака само покажа колку е немоќен и евтино си го продаде авторитетот и како намерно да ги закопа шансите на АА да и покажат заби на ДУИ на претстојните избори.
Да бараше ДУИ ваков како Таравари не можеше да најди, мајке ми.
Албанските гласачи се најкохерентните гласачи во Македонија кога се работи за евроинтеграциите. Тоа на Таравари сигурно му е појасно отколку на сите други. Што го сподеси па да извлече салто-мортале непосредно пред целта, е да се чуди човек?!
Од друга страна Села ги збива партиските редови и се обидува да ја спаси партијата од ѓурултијата што ја направи Таравари. Поранешниот лидер на Алијанса за Албанците и актуелен претседател на партиското Централно претседателство, објави фотографија со голем број партиски членови, негови приврзаници, и порача: „Тоа е големата куќа, Алијанса за Албанците“.
„Тенденциите партијата да се шверцува за сметка на не-знам-кој преку Фејсбук статус е сериозно кршење на Статутот на партијата, за што претседателот на партијата мора да одговара пред партиските органи. Обидите на претседателот на партијата ставот искажан преку социјалните мрежи да го прикаже како лична одлука е кукавички чин кој сериозно ги нарушува идеолошките линии на Алијанса за Албанците,“ реагираше Села
Во меѓувреме почнаа и физичките пресметки и заканите.
Директорот на Агенцијата за управување со одземен имот, Дритон Небиу, од Алијанса за Албанците, синоќа бил физички нападнат додека со семејството вечерал во еден познат тетовски ресторан. Непосредно пред тоа Небиу изрази јавна поддршка за Зијадин Села. Сега пак читам за наводна „куршум порака“ во дворот на Таравари.
И, за жал, сигурно нема само на тоа да запри.
Тоа се тие ситуации на кои антиевропските сили тријат раце и се насладуваат.
Политичкиот аналитичар Благојче Атанасоски во изјава за Фронтлајн вели дека чудно е зошто Таравари оди на страната на силите кои не ги изгласаа уставните измени и ги кочат евроинтеграциите
„Одлуката на Арбен Таравари да оди со етничко албанската опозиција е во најмала рака чудна….Симптоматично е зошто Таравари оди со овој фронт, кога самиот има изјавено дека по препорака на стратешките пријатели, тој влегол во власта за да го засили проевропскиот брод на евроинтеграциите. Со оваа одлука испаѓа дека тој прави политички потег со кој го напушта овој тренд и оди на страната на силите кои не ги изгласаа уставните измени за внес на Бугарите во Уставот како услов без кој не се може да се продолжат евроинтеграциите“, нагласи Атанасоски.
Таравари им „заби нож во грб“ на својата партија, на Села и на Албанците, а најмногу себеси.
Текстот е личен став на Авторот
Извор: Фронтлајн.мк