Судењето за предметот „Таргет-Тврдина“ за масовното прислушување е одложено за 29 јануари 2019 година на барање на адвокатот на обвинетиот Сашо Мијалков, Љупчо Шврговски.
Адвокатот побара одлагање поради исказите на сведокот на СЈО, Ѓорѓи Лазаревски, бидејќи содржат стручни термини, а одбраната при вкрстено испрашување не може да го испраша.
Поради тоа сакаат да користат технички советник од информатичка област кој би и помогнал на одбраната да постави прашања, а со цел за ефикасна правна заштита.
СЈО рече дека барањето е неосновано и дека има за цел одолговлекување на постапката.
Во предметот „Таргет-Тврдина“ на Специјалното јавно обвинителство обвинети се поранешниот началник на Петтата управа во МВР Горан Грујевски, Никола Бошкоски, поранешната министерка за внатрешни работи Гордана Јанкулоска, поранешниот директорот на УБК Сашо Мијалков, Тони Јакимовски, Владимир Варелов од УБК и уште пет други лица од Управата.
Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.
Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20 илјади граѓани.
Што сведочеше Лазаревски
Лазаревски е сведок во предметот на СЈО за прислушувањето „Таргет Тврдина“, каде откри детали за тоа колку време му било потребно да открие што се случува зад ѕидовите на УБК, со какви закани се соочувал и кој се бил прислушкуван од блиското опкружување на обвинетите за аферата.
Заедно со Костовски ја открија аферата за најмасовно прислушување во Македонија.
Лазаревски 11 месеци беше во притвор. Тој беше човекот кој работел во службата, сведок е на злоупотребите од огромни размери на предистражните мерки и јавноста никогаш немаше да ги чуе бомбите да не беа обичните „смртници“ од службата – професионалната администрација.
Од 20 овој месец, Лазаревски и Костовски повторно се враќаат на своите работни позиции во МВР. Тие се враќаат на работни места во УБК.
Ѓорѓи Лазаревски за НОВА изјави дека за нив ова е голема сатисфакција.