Во тешка сообраќајна несреќа што се случи синоќа загина македонската кошаркарска величина, Благоја Георгиевски-Буштур. Трагичната вест е потврдена од македонската кошаркарска федерација.
Според првичните, неофицијални информации, несреќниот момент се случил во скопската населба Кисела Вода, поточно кај сервисот „Скендеровски“. Легендарниот Буштур изгубил контрола над возилото, излетал од патот, удрил во бетонските блокови поставени покрај булеварот и починал на место.
Благоја Георгиевски е роден на 15 октомври 1950 година во Скопје. Најголем дел од својата играчка кариера ја мина во Работнички, клуб со кој се натпреваруваше во Првата југословенска кошаркарска лија. Во сезоната 1975/76 популарниот Буштур, заедно со Работнички, стигна и до полуфиналето на Купот на победниците на Куповите.
Георгиевски беше и член на младинската репрезентација на Југославија која под водство на Лазар Лечиќ го освои златниот медал на Балканијадата во Риека во 1970 година. За време на младинското Европско првенство во Атина, нашиот кошаркарски великан го освои четвртото место.
Во 1971 година, беше дел од југословенската сениорска репрезентација која настапи на ЕП во Западна Германија, каде се закити со сребреното одличје. Георгиевски беше учесник и на Летните Олимписки Игри во 1976 година кои се одржаа во Монтреал. Како составен дел на популарните „сини“, Буштур стигна до олимпиското сребро, што е најголемиот резултат на еден македонски кошаркар во историјата на овој спорт.
По осамостојувањето, Георгиевски работеше и како тренер. Беше и селектор на македонската сениорска репрезентација, член на Управниот Одбор и на Собранието на Македонскиот Олимписки комитет, претседател на Олимпискиот Совет при МОК, а беше и потпретседател на највисоката спортска институција во нашата земја.
Член е на Клубот на Великаните на Македонскиот Олимписки комитет од 1997 година. Ова е втора трагедија во кошаркарскиот свет за кратко време по хеликоптерската несреќа во неделата во која загина легнедата на светската кошарка, Коби Брајант.