Најмалку 160 точки биле ставени на разгледување за време на седницата која техничката влада ја одржа во вторникот. Освен прашањата од технички карактер, дел од точките кои извршната власт ги разгледала имале и политичка содржина, објави АлсатМ.

Поранешниот министер Ненад Новковски вели дека актуелната влада нема надлежност да носи политички одлуки.

„Владата што сега е во функција практично нема никаков мандат, дури не е ни техничка влада. Таа треба само да извршува секојдневни обврски, технички, и да ги заврши сите почнати активности до крај, за да функционира системот на државата нормално“, изјави Новковски.

Од Владата тврдат дека при донесувањето на одлуките се почитуваат сите законски процедури за функционирање на извршната власт и објаснуваат дека доколку има потреба, мислење за одлуките кои ги донесуваат, бараат и од Антикорупциската комисија.

Во владата се уште и ДУИ, партија која му ги даде потписите на лидерот на СДСМ, Зоран Заев, да формира парламентарно мнозинство и нова влада. Ваквата постапка на партијата на Ахмети, според аналитичарот Арсим Синани, не помага во решавање на кризата.

Од  ДУИ не веруваат дека повлекувањето на министрите од ДУИ би придонело да се надмине состојбата и да се формира нова влада. Според нив институциите треба да функционираат се до изборот на новата влада.

Техничката влада за спроведување на изборите беше формирана на почетокот на 2016 година. Таа имаше само тримесечен мандат, но и понатаму работи бидејќи сè уште не е избрана новата влада.