Женскиот тенис продолжува без Даниела Хантукова (34). Словачката тенисерка одлучи да стави крај на кариерата за што преку социјалните мрежи ја запозна јавноста и нејзините фанови.
„Дојде време да се повлечам од професионалниот тенис. Ми претставуваше благослов и привилегија што бев дел од ВТА, од ИТФ и од словачката репрезентација во Федерејшн куп и на олимписките игри“, напиша Хантукова на својот Фејсбук налог.
Со статус на професионалец беше од 1999 година. Во јануари во 2003 година беше петти светски рекет што е нејзино најдобро рангирање на ВТА листата во кариерата, позиција што ја дофати и во конкуренција на двојки во август во 2002 година.
Од ВТА турот се повлекува со заработувачка од преку десет милиони евра. Во моментот на објавување на одлуката е 317 тенисерка во светот. Освои седум титули во кариерата, на гренслем турнирите играше полуфинале на Австралија опен (2008 година) и четврт-финале на Ју-Ес опен (2002 година, 2013 година) и на Вимблдон (2002 година). Двапати играше и на завршните Мастерси во сезоната (2002 година, 2007 година).