Се наближува крајот на одморот што самиот си го даде и се подготвува за враќање на терен. Роџер Федерер најави учество на Ролан Гарос, вториот гренслем во сезоната во која има три трофеи од Австралија опен и од Мастерсите во Индијан Велс и во Мајами. Од почетокот на април е без натпреварувачки настап што практично значи дека ја пропушти, речиси, комплетната сезона на земја, но не и Отвореното тениско првенство на Франција.
„Пријавен сум и планирам да играм во Париз. Се чувствувам привилегирано што повторно сум на терен. Минатата година беше исклучително тешка за мене. Имав операција, а коленото не се рехабилитира во целост. Имав и проблеми со грбот исто така што се влошија за време на Вимблдон по што следуваше пауза од шест месеци“, истакна Федерер.
Швајцарскиот тенисер во јануари во Мелбурн ја освои рекордната 18 титула во кариерата, на австралискиот гренслем го одигра 100. меч, а во Мајами го подигна и 26. Мастерс трофеј. Во август ќе наполни 36 години, но одлучен е во намерата да остави силен белег на годината и покрај возраста и повредите што го нападнаа лани. За таа цел и редуцираната агенда на настапи во 2017 година, прескокнување на турнирите во Монте Карло, во Барселона и Рим и паузата за рекуперација до Ролан Гарос.
„Имав прилика да бидам со семејството и многу време за подготовки за новата сезона. Постојано верував дека напорната работа ќе се исплати. Добив втора шанса да заиграм на професионалните турнири и беше возбудливо кога се вратив во Австралија. Уживав таму и се уште уживам во секој настап“, додаде Федерер пред гренслемот во Франција пто го освои во 2009 година.
Ролан Гарос оваа година ќе се одржи по 116 пат. Ќе почне на 28 мај и ќе трае до 11 јуни. Наградниот фонд е 32 милиона евра. Победниците во двете конкуренции ќе добијат по 2,1 милиони плус 2.000 АТП и ВТА бодови. Бранител на титулата кај мажите е Србинот Новак Ѓоковиќ, кај дамите Шпанката Гарбине Мугуруза.