Адвокатите Сања Алексиќ и Боро Тасевски денеска не се појавија на почетокот на судењето на екс министерката за внатрешни работи Гордана Јанкулоска за случајот „Тенк“.
Тие се појавија со 20 минути задоцнување, откако судијката Добрила Кацарска се закани дека ако не се појават набрзо ќе ги казни со високи парични казни, а на обвинетата ќе и одреди адвокат по службена должност.
-Или да се јави еден адвокат, или ќе ги казнам и двајцата со висока парична казна и ќе ви назначам бранител по службена должност, и рече Кацарска на Јанкулоска.
Двајцата адвокати се водено и бранители на обвинетите во предметот ,,Насилство во Центар”, кое исто така е закажано денеска.
Сепак адвокатот Тасевски набрзо ја напушти судницата, истакнувајќи дека најверојато ќе и го откаже полномошното на Јанкулоска, бидејќи е ангажиран во повеќе предмети, за кои рочиштата се преклопуваат.
-Со оглед на ставовите на овој судечки совет чија суштина е дека нема одлагање на предмети кои се поклопуваат а јас не можам физички да сум присутен на повеќе рочишта против моја и против волја на обвинетата Јанкулоска јас денеска нема да бидам присутен на ова рочиште. Мојата одлука дали ќе го откажам моето полномошно во овој предмет ќе ја соопштам дополнително, рече Тасевски.
Рочиштето за „Тенк“ продолжи со распитот на сведоци.
Сведокот Ненад Николовски во 2012 година вработен во МВР како раководител на одделението за јавни набавки сведочеше дека уште во јануари истата година во планот за јавни набавки била предвидена набавката на мерцедесот. Најголем дел од прашањата за него се однесуваа на условите на тендерот и вредноста на набавката на мерцедесот.
-Првичната вредност за набавка на моторното возило беше помала, колку што се сеќавам двојно помала од онаа во која се донесе одлуката за јавна набавка но проценката на вредноста е критериум спроведливост но не и прифатливост на понудата и тоа е само план, рече Николовски.
По однос на техничките спецификации, Николовски рече дека тие се дел од тендерската документација, процес кој започнал во 2011 година кој тогаш не бил неуспешен.
-Не знам ништо за планот за набавка на блиндирано моторно возило во 2011 година освен дека тогаш набавката се однесуваше на половно а не на ново моторно возило, рече Николовски.
На прашање на обвинета Јанкулоска дали измената на вредноста на набавката на мерцедесот е согласно прописите, Николовски одговори дека се било законски затоа што измената на вредноста за набавка на мерцедесот била дозволена со Законот за јавни набавки.
На ова судско рочиште на кое треба да сведочат уште шестмина сведоци ќе има најмалку една пауза согласно правата на Јанкулоска за извршување на мајчинските обврски.