Седницата на Судскиот совет која беше закажана за во 11 часот од страна на заменик-претседателот Селим Адеми, е одложена за 13 часот. На седницата, според планот на потпретседателот, треба да се избере нов претседател на највисокото судско тело откако вчера во негова режија беше извршен пуч на претседателката Весна Дамева која експресно беше сменета од претседателската функција.
Дел од присутните новинарски екипи кои пред зградата пристигнаа порано од 11 часот, за кога беше закажан почетокот, од отворените прозорци каде се наоѓаат просториите на Судскиот советслушнале караници и обвинувања дека „ова е анархија”, и „не може ова вака“.
Начинот на кој вчера беше разрешена Дамева предизвика ерупција од реакции и во фелата, и кај експертите и кај политичките кругови кои засега од дистанца го следат ова незапаметено незаконско постапување во врвот на судската пирамида. Реакциите се сведуваат на тоа дека во Законот за Судски совет, и во Деловникот за негова работа нема предвидено процедура за разрешување на претседател.
Дали Адеми и неговите приврзаници го искористиле тој правен вакуум?
Вчера и Коалицијата „Сите за правично судење“ реагираше дека за Дамева да биде разрешена од претседателка, требало да биде разрешена од член на Судскиот совет, а за тоа, потенцираа, е потребна соодветна процедура за дисциплинска постапка во која кога ќе дојде до разрешување, дека се потребни осум гласа „за“, не сметајќи го оној на предлагачот. Дамева, пак, беше разрешена само од претседателската функција со седум гласа, вклучително и на заменик-претседателот кој го иницираше разрешувањето.
Блупринт групата за реформи во правосудството, денеска исто така реагираше дека недоволното регулирање на одредени законски одредби не значи и несоодветно постапување односно произволно толкување на постоечките одредби.
„Доколку интенцијата била да се разреши претседателката на Судскиот совет користејќи ја аналогијата за разрешување на судија, сепак самиот чин на разрешување е спорен од причина што Законот за Судски совет на РСМ предвидува дека за разрешување на судија потребно е да гласаат 8 члена од присутните членови со право на глас. Во конкретниов случај гласале 7 члена без претходна дискусија и без запазување на постапката која се применува за разрешување на судија“, реагираа тие, додавајќи дека вчерашниот настан дополнително ќе ја руинира поради непочитување на законите и произволно постапување со што директно го поткопува уставниот и правниот поредок во Република Северна Македонија.
С.К.