Основното јавно обвинителство соопшти дека при спроведувањето на сеопфатна постапка за случувањата во Собранието на Република Македонија на 27 април, презело голем број истражни дејствија и прибавило обемен доказен материјал.
Обвинителството утврдило дека постои содејство на неколку осомничени во целокупните збиднувања околу и во Собранието.
„Станува збор за сплет на инкриминирани дејствија кои што значат остварување на законски битија на поголем број кривични дела кои не можат да се припишат само како деликт на масата, ниту пак на од таму произлезени конкретни кривични дела на сторители. Основното јавно обвинителство Скопје од досега прибавениот доказен материјал оцени дека во кривично правниот настан кој го истражуваше, потребно е во оваа фаза, согласно законските прописи, да се вклучи и Основното јавно обвинителство за гонење на организиран криминал и корупција“, се вели во соопштението од ОЈО.
Оттаму информираат дека списите на предметот се доставени до надлежното Основно јавно обвинителство за гонење на организиран криминал и корупција, кое ќе го преземе натамошното постапување.
Правните експерти кои ги консултираше НОВА ТВ, објаснуваат дека штом во истрагата се вклучува и ОЈО за организиран криминал и корупција, постојат докази дека дел од осомничените дејствувале како организирана група и освен кривичното дело „Учество во толпа“, најверојатно ќе се гонат и за други потешки дела.