Постарите со аргументи од животно искуство ги убедуваат помладите со искуства од социјалните мрежи дека вакцинацијата е неопходна
Акцијата за теренска имунизација против коронавирусот донесе неочекувано добри резултати барем кога станува збор за селата во регионот на Преспа. И покрај дилемите околу ефикасноста на вакцината и нејзините ефекти сепак голем дел од локалното население се одлучи да ја искористи оваа можност.
Добро е што дојдоа, кај да ја носам јас мајка на 80 години од тука до Ресен по овие жештини. Вака си завршивме работа- вели еден од жителите во селата. Само во три села, Брајчино, Љубојно и Долно Дупени населени од едвај 300 жители во четири часа беа аплицирани 45 вакцини воглавно кај постари лица кои не успеале или не биле во можност да одат до вакциналните пунктови во Ресен и Охрид оддалечени од овие села по 25 и 55 километри. Голем дел од популацијата во овој планински регион се вакцинирале а еден дел како што велат ќе го сторат тоа во август или септември со оглед на тоа што веќе ја прележале болеста.
– Заинтересираноста е голема , поголема од нашите очекувања. Во селата Крани и Арвати денеска се вакцинира 60 жители и ќе мора да дојдеме уште еден ден да одговориме на интересот на останатите кои не успеавме да ги вакцинираме денес. Голем дел од населението не се вакцинирал поради лошите транспортни врски на селата со Ресен и Охрид- вели надлежниот на теренскиот тим за имунизација, доктор Коста Замановски.
За вакцинација пројавиле интерес и лица кои се на привремен престој во регионот на кои според доктор Замановски ќе им биде излезено во пресрет да им се обезбедат двете потребни дози.
Впечаток прави што интересот е поголем кај постарите лица додека дел од помладата популација се уште има дилеми околу потребата за имунизација. Пред локалните продавници каде вообичаено се собираат жителите на селата често се слуша дебатата околу вакцинацијата при што постарите лица кои се повикуваат на здравиот разум воден повеќе од своето животно искуство а помалку од често конфузните или лажни информации кои се шираат по социјалните мрежи се обидуваат да ги убедат помладите да се вакцинираат.
Теренската имунизација во Преспа ќе продолжи до крајот неделата но ако има потреба како што вели доктор Замановски таа ќе продолжи и наредната недела.