Британската влада на чело со Тереса Меј ја објави стратегијата за Брегзит. Во неа се вклучени “12 принципи“ вклучувајќи ги контролата над миграцијата и контролирањето на сопствените закони.
Според Дејвид Дејвис, секретар задолжен за спроведување на референдумот, најдобрите денови за Велика Британија надвор од ЕУ, допрва ќе следат.
Во однос на трговијата, Британците ќе се повлечат од внатрешниот пазар и ќе бараат нови спогодби за слободна трговија со ЕУ.
Планот на Меј е да се инсталира нов систем за миграција кон и надвор од ЕУ како и посебен систем со европските земји за правата на Европјаните на Островот и за Британците коишто живеат во другите европски земји.
За Шкотска, Велс и Северна Ирска, според плановите на властите, ќе следат поголеми овластувања, предвидува планот.
Лабуристите од друга страна бараат, доколку бидат незадоволни од договореното, власта повторно да се врати на преговарачката маса.
Врховниот суд неодамна одлучи дека британските парламентарци ќе мора да бидат консултирани од Владата пред да биде активиран Членот 50 за излез од ЕУ.
Според проценките, се очекува преговорите да траат околу две години, и Велика Британија формално да ја напушти Унијата во 2019 година.