За време на референдумот Тереза Меј, новата британска премиерка, му беше верна на Дејвид Камерон и се залагаше за останување на Велика Британија во ЕУ. И потајно се надеваше дека резултатите ќе бидат спротивни. Нејзината евроскептичност е добро позната на британскиот остров.
За време на кампањата таа вешто играше и им стана симпатична и на “брегзитовците” и на “останувачите”. Се залагаше за ограничување на имиграцијата, омилена тема на поддржувачите за излез од ЕУ.
Ќерка на англикански пастор родена во 1956 година, Тереза Меј е “ужасно тешка жена”, вели во еден тајно снимен разговор Кенет Кларк, екс министер на Ториевците. И додава дека “следниот кој ќе се соочи со нејзиниот тежок карактер е Жан-Клод Јункер”, претседателот на Европската комисија кога ќе треба со неа да го преговара излезот на Велика Британија од ЕУ.
Уште пред да стане премиер, Мај им ги одзеде сите надежи на Британците кои сакаат да останат во ЕУ и најави дека “брегзит значи брегзит и ние од тоа ќе направиме успех”. И додаде дека нема да има обиди да се остане во ЕУ преку некоја друга врата и дека нема да има втор референдум.
Како министер за внатрешни работи Тереза Меј беше чест гостин во Брисел и добро ги познава европските лавиринти. Тоа значи дека таа нема да попушти пред се почестите европски барања до Лондон што побрзо да го активира членот 50 од Европскaта повелба за да можат да почнат преговорите за излез. И дека ќе стори се за да ја стекне довербата на 27те европски лидери.
Неизвесниот дел од оваа мисија се изборите во 2017 година, претседателски во мај во Франција и парламентарни во Германија во септември. Во текот на изборната кампања овие двајца моќни лидери, Меркел и Оланд, ќе покажат непопустливост.
Средбата помеѓу Меј и Ангела Меркел може да биде интересна. Тие две дами имаат неколку заеднички точки а ќе треба да решаваат проблем околу кој не се на иста бранова должина. На иста возраст се, двете се ќерки на протестантски пастори и пораснале далеку од голем град, двете имаат импресивни дипломи, двете се без деца и двете сакаат пешачење и готвење.
Првата средба на Меј со лидерите е закажана за октомври кога од неа ќе се бара да каже како ги замислува идните британски односи со ЕУ.
Меј студирала географија на Оксфорд а потоа кусо работела во Банката на Англија пред да ја почне политичката кариера во 1986 година кога била избрана за советник во луксузниот лондонски кварт Мертон.
Во 1997 година е избрана за пратеник и станува првата жена генерален секретар на конзервативната партија. Од 2005 година станува верен следбеник на Дејвид Камерон и му помага да стане премиер. Како награда за залагањето, Камерон ја назначува за министер за внатрешни работи во 2010 година.
Тереза Меј е голем работник, за неа велат дека е премногу сериозна и строга. Иако физички по малку потсетува на славната Маргарет Тачер, Меј никогаш не криела дека радикализмот на Тачерка не и е омилен. Сепак, Меј секогаш се залагала за влегување на повеќе жени во врвот на партијата.
“Меј се наметна како новата “железна дама”, сосема спротивна на “мекоста” на центристите кои ги претставуваше премиерот Камерон”, вели за францускиот Фигаро во 2013 година Родни Баркер, професор во Лондонската школа за економија.
“Меј е позиционирана во најдесниот дел на конзервативната партија и секогаш покажувала тврд став кон деликвентите и имиграцијата. Во екот на мигрантската криза во 2015 година таа изјави дека масивната имиграција е закана за Велика Британија”, напиша Гардијан.
Според нејзините блиски соработници, на Меј и недостасува човечка топлина и леснотија во комуницирањето. Луѓето кои работат во неа тврдат дека таа се обидува да ги поправи овие маани па така на медиумите им дава фотографии на кои таа и нејзиниот сопруг се во нежна прегратка или слики од нејзината свадба во црква во 1980 година.
Очигледно, новата премиерка не сакала да има деца иако има добар брак. За неа се чини била поважна политичката амбиција: “Флексибилноста во работењето не е за жени со деца”, изјавува Меј. Други извори тврдат дека сакала но не можела да има деца.
Нејзините пријатели велат дека сака долги пешачења, дека добро готви а во интимно друштво е духовита и шармантна. Што не би се рекло според нејзината класична и строга гардероба. Но, да не судиме според изгледот: фрлете поглед на нејзините оригинални чевли. Кои и се слабост. И во тотална спротивност со нејзиниот строг изглед и тежок карактер.
Инаку Меј е горда што за неа велат дека “тешка жена”. Според неа, во политиката треба да има што повеќе “тешки жени”.