Терминот „ГорнаМакедонија“ кој излезе во јавноста како предлог кој бил прифатлив за грчката страна е шпекулација со која се манипулира јавното мислење, дознава НОВА од високи дипломатски извори.
Овој термин излезе најпрво во грчките медиуми кои објавија дека „Република ГорнаМакедонија“, напишано споено, било прифатливо решение за Грција која и го предложила за ерга омнес употреба.
Потоа овој термин го пренесоа и некои од македонските медиуми по што на социјалните мрежи се јавија и реакции од домашната јавност, најчесто со мислења дека се задира во идентитетот на државата.
Медијаторот на ОН во спорот за името меѓу Македонија и Грција, Метју Нимиц денеска при посетата во Скопје рече дека досега не наишол на ништо од грчката страна што го негира идентитетот на Македонија, туку напротив дека има волја и од двете страни за конечно решение.
Предлозите на Нимиц од последната рунда преговори во Њујорк засега не се објавуваат во јавноста, а не се знае и тоа дали е еден или повеќе, со цел лидерите на државата прво да ја разгледаат неговата понуда.
Државниот и политичкиот врв во Македонија токму за тоа неодамна имаше и координативна средба, по која, според изјавите, видлив беше оптимизмот дека простор за решение има.