Шефови на дипломатии на земјите членки на Организацијата за исламска соработка (ОИС) упатија барање до Обединетите нации (ОН) и другите меѓународни и регионални организации за прогласување на 15 март како меѓународен ден на солидарноста против исламофобијата.
Нивниот состанок во Истанбул дојде како последица на неодамнешниот терористички напад во Нов Зеланд. Притоа е објавена заедничка изјава во која е истакнато дека тероризмот нема вера и нагласен е ставот дека ваквите терористички акти, без оглед каде, кога или кој е извршител, на ниту еден начин не може да имаат оправдување.
Извршниот комитет на ОИС ги осуди „ужасните и подли исламофобични терористички напади врз невините луѓе кои се молеа во џамиите Нур и Линвуд во градот Крајстчрч во Нов Зеланд, пренесува агенцијата „Анадолија“.
Воедно е поздравен ставот на Владата на Нов Зеланд на чело со премиерката Џасинда Ардерн која најостро го осуди терористичкиот напад, истакна поддршка на муслиманската заедница во земја и се солидаризира со семејствата на жртвите.
Подвлечено е дека солидарноста што ја покажала комплетната новозеландска јавност е за секоја пофалба.
„Овие одвратни терористички напади на џамии и општествени центри и убивање на муслиманите, уште еднаш укажаа на бруталните, нехумани и страшни последици на исламофобијата. На сите нивоа и платформи потребно е сите меѓународни актери да бараат сеопфатни и системски мерки“, се нагласува по состанокот на министрите за надворешни работи на земјите членки на ОИС.
Упатен е апел до сите земји со муслимански заедници, малцинства и мигранти за воздржување од сите политики, изјави и практики што го поврзуваат исламот со тероризмот, екстремизмот и заканите по општеството. Сите држави се повикуваат да не ги ограничуваат темелните човекови права и слободи на муслиманите, вклучувајќи и почитување на верските слободи, стои меѓудругото во заедничката изјава на шефовите на дипломатии на ОИС.
Упатено е барање до сите влади во своите земји да забранат секаков вид дискурс, обид или делување со кои се премолчува, поттикнува, охрабрува или предизвикува непријателство кон муслиманите, односно понижување на исламот и муслиманите.
Извршниот одбор на ОИС го повика Високиот комесаријат на ОН за човекови права и Комесаријатот за човекови права на Советот на Европа на воспоставување опсерваторија за следење и пријавување дела од верска омраза, непријателство и насилство.