Новиот Клинички центар во Скопје во вредност од 72 милиони евра во јуни ќе го градат градежните компании „Гранит“ и „Бетон“ во соработка со една италијанска компанија, соопшти на прес-конференција министерот за здравство Никола Тодоров, кој рече дека дека оваа понуда била избрана како најприфатлива и дека изборот е направен со одобрување од стручен тим од Банката за развој на Советот на Европа.
-Потпишувањето ќе биде по доставување на валидната банкарска гаранција од понудувачот за квалитет на изведбата во вредност од 10 проценти. Рокот за завршување на градбата на новиот Клинички центар е предвиден за 45 месеци, рече Тодоров.
Според ветувањата на ВМРО-ДПМНЕ во пресрет на изборите во 2014 година изградбата на Клиничкиот центар требаше да биде готова годинава.
Од СДСМ преку соопштенија одговорија дека нов Клинички центар во Скопје ќе изгради новата реформска Влада и најавија преиспитување на работењето на Тодоров, вклучувајки го и „скандалозниот, сомнителен тендер за Клиничкиот центар“ што го реализира власта во заминување со технички овластувања.
– Клиничкиот центар во Скопје требаше да биде готов до 2 јануари 2017 година. Денеска е 23 април 2017 година, а од новиот Клинички центар се уште ги има само тарабите покрај кои се шетаа Тодоров и Груевски пред три години, се вели во соопштението.