Претставникот на ВМРО-ДПМНЕ, Никола Тодоров денеска на прес-конференција повтори дека одлуката на ДИК за графолошко вештачење на потписот на гласачката Фатиме Сулејмани врз основа на еден од приговорите на БЕСА е незаконска и е со цел да се фалсификува победата на неговата партија.
Тој рече дека поради „инжинерингот“ за одземање на нивната победа, во затвор ќе завршат невини луѓе со цел да се задоволи амбицијата на СДСМ.
Никола Тодоров им порача на членовите на ДИК да размислат дали се подготвени во затвор да испратат седум невини луѓе и дали сфаќаат што ќе им направат на нивните семејства.
Во однос на тоа дали со протестот пред ДИК се врши притисок врз комисијата, Тодоров негираше дека тоа е целта, туку дека било важно ДИК да работи согласно законите.
Одговарајќи на новинарско прашање, посочи и дека не знае дали пред ДИК протестирале нивни поддржувачи, иако функционери на ВМРО ДПМНЕ држеа говори, и дека се работело за незадоволни граѓани од работата на ДИК.
Во меѓувреме, графологот за случајот со Фатиме Сулејмани утврди дека таа не гласала и дека нејзиниот потпис бил фалсификуван.