Американскиот глумец Том Хенкс есенва снимаше филм во Будимпешта. На улиците ја видел колата Фиат 126, кај нас позната како “пегла” и…. се вљубил!
Оваа мала градска кола, произведена прво од Фиат, беше многу популарна во комунизмот. Во 1975 Полска ја произведуваше колата под марката Фиат 126 полски.
Својот ентузијазам за оваа легендарна кола Хенкс го споделил на Твитер. Твитот го видела Моника Јасколска, жена од 42 години од Биеско-Биала во Полска каде што колите биле произведувани.
Кога Моника го видела твитот добила идеја: да му се подари “пегличка” на Хенкс. И тргнала во акција на социјалните мрежи барајќи донации за да се купи колата. Откако собрала 2.000 евра, купила Фиат 126 од еден колекционер.
Колата мора да помине кај механичар на ремонт за да се оспособи да вози. Колата потоа ќе биде качена на авион и ќе патува за Лос Анџелес. Трошоците ги покрива авиокомпанијата која ќе ја пренесе “пегличката” преку океанот.
Во текот на 30 години во Полска биле произведени 3,5 милиони автомобили од оваа марка. Последната излегла од фабриката во 2000 година.