Балканските земји се соочуваат со екстремни временски услови, вклучувајќи високи температури, силни ветрови и невреме, што предизвикаа значителни последици во регионот, според извештаите на локалните метеоролошки служби и медиуми.
Турција се подготвува за нови топлотни бранови, при што температурите во повеќе региони, вклучувајќи ги Одрин, Баликесир, Измит, Маниса, Ајдин, Денизли, Килис, Шанлиурфа, Дијарбекир, Батман и Адијаман, се очекува да надминат 40 целзиусови степени.
Според турската Метеоролошка служба, температурите ќе бидат за шест степени повисоки од вообичаените за овој период, со пик в среда. Експертите ги повикуваат граѓаните, особено постарите лица, децата и хронично болните, да избегнуваат излегување на отворено во пладневните часови поради зголемен здравствен ризик. Во југоисточна Турција е издадено и предупредување за силни ветрови со брзина над 60 км/ч.
Во Србија, по „тропската“ ноќ, дневните температури достигнуваат до 40°C, особено во јужните, источните и југоисточните делови, каде е активиран црвен метео аларм за екстремни горештини. Во северните и североисточните региони се очекуваат врнежи и грмотевици, со жолт код за дожд. Српските метеоролози најавуваат промена на времето од вторник, со циклон што ќе донесе разладување, врнежи и грмотевични бури на запад, додека југот и истокот ќе останат топли. Локално се можни обилни дождови и град. До среда температурите ќе паднат на 22-23 степени, а до петок на околу 25 степени.
Романија, исто така, е погодена од топлотен бран, со црвен метео аларм за горештини во Букурешт и 14 окрузи во јужниот дел, каде температурите ќе достигнат 38-41 степен, засилени со висока влажност над 80 отсто. Во овие области се очекуваат „тропски ноќи“ со температури над 20 степени. Портокалов метео аларм е во сила за централна, источна и североисточна Романија, со температури од 36-38 мстепени, додека жолт код важи за северозападните и крајните југоисточни делови, со максимални температури од 33-36 степени. Властите во Букурешт испратија предупредувања преку системот Ро-Алерт, а Министерството за здравство ги повика службите за итна помош да се подготват. Пожарникарите ги советуваат граѓаните да избегнуваат палење оган во суви области и да внимаваат при фрлање отпушоци.
Во Грција, властите воведоа задолжителни паузи за работа од пладне до 17 часот за физички труд на отворено и услуги за достава на храна во региони каде температурите надминуваат 40 степени. Топлотниот бран се очекува да трае до четврток. Во Атина не се воведени вонредни мерки, а властите преземаат долгорочни мерки за справување со климатските промени, вклучувајќи рекордно распоредување на пожарникари.
Во меѓувреме, невреме предизвика хаос во Загреб, каде силен ветер, дожд и грмотевици предизвикаа значителна материјална штета. Во населбите Травно и Дугаве, дрвја и гранки паднаа врз паркирани автомобили и сообраќајници, предизвикувајќи прекини во сообраќајот. Загрепскиот електричен трамвај (ЗЕТ) соопшти дека автобусите на линиите 109 и 220 сообраќаат по скратени траси. Метеоролозите велат дека ова е почеток на ладен фронт што ќе се прошири низ регионот, при што температурите во Загреб паднаа за шест степени во рок од еден час.
Слично невреме утрово го погоди Бихаќ околу 10:30 часот, предизвикувајќи материјална штета поради силен ветер и дожд. Метеоролозите во Босна и Херцеговина најавуваат сончево време со повремени локални врнежи и грмотевици, со дневни температури од 28 до 34 степени, а на североисток до 37 степени.