Интензивните горештини во поголемиот дел од Европа предизвикаа јунски температурни рекорди од Арктичкиот круг сè до Северна Африка. Силниот топлотен бран предизвика пораст на температурите значително над просекот за јуни во бројни земји, во некои случаи и до 20 степени. Во средата Норвешка забележа температура од 32,5 степени во Банак, наводно највисоката температура досега забележана внатре во Арктичкиот круг во Европа. Тоа е значително повисоко од јунскиот просек од 13 степени.
Во Полска во понеделникот температурата достигна околу 35 степени, а во делови од источна Германија измерени се 37 на повеќе локации.
Рекорди во регионот
Јунските температурни рекорди беа срушени во Словенија и Хрватска, додека во Босна и Херцеговина температурата беше за 0,2 степени пониска од јунскиот рекорд од 41 степен. Екстремните горештини се проширија во Северна Африка. Температурите во Тунис во понеделникот го израмнија месечниот рекорд од 48,7 степени.
Од друга страна, Европа ја зафатија грмотевици кои предизвикаа разорен одрон во јужна Австрија, при што едно лице загина. Поплавени се куќи и патишта во Корушка. Во останатиот дел од неделата се очекуваат нови грмежи придружени со град и засилен ветер.