Во Кривичниот суд денеска треба да се одржи првото рочиште за предметот на СЈО „Тортура“, за апсењето на лидерот на „Обединети за Македонија“ Љубе Бошкоски, на 6 јуни 2011 година, ден по предвремените парламентарни избори.
Поранешниот прв човек на единицата „Алфа” Ивица Антевски – Пуки и уште петмина припадници на единицата се обвинети за начинот на кој беше апсен екс министерот за внатрешни работи Бошкоски.
Специјалното јавно обвинителство ги гони за мачење и друго сурово, нечовечко или понижувачко постапување и казнување.
Во оваа постапка првообвинет беше поранешниот прв човек на УБК, Сашо Мијалков. Но, судот делумно го прифати обвинението на СЈО и според донесената одлука, ќе им се суди само на шетмината од единицата „Алфа”, но не и на поранешниот прв човек на УБК.
На оваа одлука СЈО поднесе жалба до Апелацискиот суд, кој треба да одлучи дали обвинителниот акт ќе се однесува и на Мијалков.
Во една од „бомбите“ што ги објави опозицијата, токму за овој настан разговараат екс директорот на УБК Мијалков и тогашниот главен уредник на ТВ Сител Драган Павловиќ Латас, против кого се води друг процес од СЈО.
На аудио снимката соговорниците зборуваат за начинот на кој се постапувало со Бошкоски за време на апсењето.