Во Кривичниот суд е дадена пауза од еден час на судското рочиште за случајот „Траекторија“ во кој обвинети се поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.

Одбраната побара одложување на рочиштето и да и биде даден записникот од рочиштето од 31 јануари. Обвини дека се уште не и е доставен, иако го побарале со цел да се подготват соодветно за денешното рочиште. Адвокатот Донче Наков побара записниците да им бидат дадени на ЦД за да може да продолжат со воведни зборови.

Адвокатскиот тим на Груевски се пожали дека ако судот го одбегнува спроведувањето на Законот за кривична постапка тие на обвинетите нема да можат да им понудат правна помош.

Според обвинителката на СЈО, Лиле Стефановска, сите предлози и забелешки се даваат со цел одлагање, а не подготовка на одбраната. Таа рече дека судот е должен да овозможи да тече непречено главната расправа.

– Ако главната расправа започнува со давање воведни говори не гледам зошто да не почнеме со главна расправа. Сите предлози и забелешки се даваат со цел одлагање, а не за подготовка. Сметам дека ваквиот начин на поднесување предлози и забелешки само го отежнува работењето, посочи Стефановска.

Судијата Горан Бошевски рече дека записниците од претходните рочишта можат да се подигнат од шалтерот во судот.

На почетокот на денешното рочиште, судијата Бошевски ги одби предлозите на одбраната да им бидат предадени доказите на ЦД или во пишана форма, како и аудио снимките да се одбијат како материјални докази во постапката.

Во однос на аудио снимките, Бошевски рече дека независно што тие се креирани на незаконит начин, сепак од СЈО се предадени на законит начин и можат да се користат во постапката.

Бошевски посочи дека транскриптите од снимките не се доказ, туку помошно средство и апелираше, но не го задолжи СЈО, ако може да ги даде на одбраната на ЦД, бидејќи и судот нема ништо против тоа да биде направено.

Како дел од доказниот материјал во овој случај се 315 аудио-снимки.

Судењето за „Траекторија“ почна од почеток на 31 јануари поради променет судечкиот совет.

Адвокатите на обвинетите ги оспоруваат и вештачењата за направената штета со изградбата на автопатиштата во износ од 155 милиони евра.

Во „Траекторија“, Груевски, Јанакиески, Пешевски и Георгиевски се обвинети дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања. Со тоа, според СЈО, му нанеле штета на државниот буџет од најмалку 155 милиони евра и за истиот износ на компанијата изведувач и овозможиле да се стекне со имотна корист.