Ова е ужасен, црн, трагичен потсетник за сите родители, чии деца секојдневно се изложуваат на ризици поради отсуството на грижа за безбедноста и превенцијата.
Џабир Дерала
Сакам лично и во името на ЦИВИЛ да им изразам длабоко сочувство на родителите и блиските на настраданите во Кочани.
Шокиран сум од ужасната несреќа што му се случи на Кочани минатата ноќ. Ова е неопислива, ужасна трагедија за семејствата и блиските на настраданите, меѓу кои има и деца.
Ова е ужасна трагедија и за сите нас. Со жртвите и семејствата сочувствува целата земја завиена во црно, целиот регион и многу пошироко.
Ова се тешки мигови кога секој човек е длабоко погоден од оваа ужасна несреќа. Длабоко сум трогнат и од луѓето кои ја изразуваат својата тага и солидарност на социјалните мрежи.
Трагичната загуба и на еден човечки живот е премногу, а камоли повеќе од 50, во само една ноќ, на место предвидено за забава. А меѓу нив имало и деца!
Знам дека набрзо ќе пристигнат и тешките прашања за одговорноста, иако тоа нема да ја намали болката за трагичната загуба на животите минатата ноќ.
Ова е ужасен, црн, трагичен потсетник за сите родители, чии деца секојдневно се изложуваат на ризици поради отсуството на грижа за безбедноста и превенцијата.
Милионски се профитите на газдите на клубовите и дискотеките. Кога би вложиле дел од својот мрсен профит во безбедност и превенција – трагедијата во Кочани немаше да се случи. Милионски се буџетите и на институциите чија задача е да се грижат за безбедноста на луѓето. Да инвестираа повеќе во безбедноста, а помалку во партиски вработувања и пи-ар, оваа трагедија немаше да се случи.
Неприфатливо е министерот за внатрешни работи да одбива да одговори на прашањата, да бара да биде оставен да работи. Тој не се занимава директно со ситуацијата на теренот, не е обврзан физички да трага по фактите, ниту е директно во командната структура на полицијата – не е ни обучен за тоа. Тој е лицето повикано да ѝ одговори на јавноста, да одговори на сите прашања, колку и да се наивни.
Кој дозволил во објектот да влезат деца? Кој ја издал лиценцата за тој објект? Дали некој се занимава со стандардите на овие објекти и дали тие стандарди се почитувале во дискотеката?
Сигурно е дека треба да се соочат со правдата сите што непосредно се одговорни за оваа трагедија. Но мора да одговараат, законски и политички, сите што се повикани да ги спроведуваат стандардите и законите, да воспостават систем за превенција и безбедност за луѓето.
Текстот е сопственост на ЦивилМедиа