По моструозното убиство на тричлено семејство од Алексинац, јавноста во Србија денеска беше потресена уште еден трагичен настан. Две девојчиња на возраст од пет и од седум години од Обреновац, настрадале од струен удар.
Се претпоставува дека смртта е предизвикана од струен удар, а медиумите пренесуваат две верзии на настанот.
Порталот Пинк.рс наведува дека околу 15.40 часот, сосетка ја повикала дежурната служба и пријавила дека има поплава во станот на улицата Караѓорѓева, и дека некој повикува помош.
Патролата веднаш излегла на лице место и открила дека во станот има три деца, на возраст меѓу 6 и 8 години. Според медиумите, децата биле сами во станот, бидејќи нивната мајка била на работа.
„Курир“ пренесува дека мајката била во станот и дека ги капела децата во кадата кога се случила трагедијата. И таа била повредена од струен удар, но била свесна и комуникативна. Заедно со нејзините деца, таа била пренесена во здравствениот дом во Обреновац. Во болницата лекарите се обиделе да ги реанимираат децата, но, за жал, не успеале.
Во станот имало уште едно дете, но тоа не било повредено.