Зоран Трајчевски, директорот на Агенцијата за аудио и аудиовизуелни медиумски услуги смета дека со укинувањето на радиодифузната такса и финансирањето на Агенцијата од страна на Буџетот ќе се наруши независноста на оваа институција. Тој смета дека ова е само популистички чин за исполнување на предизборни ветувања.
„Укинувањето на радиодифузната такса и финансирањето од Буџетот значи тотално рушење на независноста на институцијата и ставање под капата на Владата. Ако постоела таква пракса ќе била применета и во другите европски земји. Ова е популистички чин со којшто сакаат да се исполнат предизборни ветувања, за жал и на опозицијата и на позицијата, не водејќи притоа сметка дека се уништува функционирањето на Агенцијата, која претходните 20 години, поради финансиската независност, можеше да ја врши улогата во општеството“, изјави Трајчевски на денешната регионална конференција за медиуми.
Одговарајќи на новинарски прашања во врска со подготовката на нов закон за медиуми, тој рече дека неговиот личен став е оти се работи за текст на закон кој е спротивен на европските директиви.
„Во изработката на законот, ние не сме вклучени. Логично е да има јавна расправа и да бидат вклучени сите субјекти кои се засегнати од законот“, рече Трајчевски.