Американскиот претседател Доналд Трамп изјави дека денеска ќе објави дали Соединетите држави ќе останат во нуклеарната спогодба со Иран.
Трамп претходно го одреди 12 мај за краен рок за одлуката за евентуалното излегување на САД од спогодбата меѓу Иран и шестте големи сили од 2015 година која долго време ја критикува.
Тој навести дека САД ќе ја напуштат спогодбата ако до 12 мај не дојде до негова ревизија, но е изложен на силен притисок од европските сојузници да се откаже од таквата намера.
Шефот на британската дипломатија Борис Џонсон вчера изјави дека американскиот претседател Доналд Трамп ја заслужува Нобеловата награда за мир ако успее да го реши проблемот со Иран и на Корејскиот Полуостров.
-Не гледам зошто тој би бил помалку кандидат за Нобеловата награда за мир од (поранешниот претседател на САД) Барак Обама, изјави Џонсон за „Скај њуз“.
Џонсон вчера ја почна дводневната посета на САД во обид да ја убеди администрацијата на Трамп да не излегува од Договорот со Техеран.
Тој во авторски текст за „Њујорк тајмс“ упати апел до Трамп да не ги повлекува САД од Договорот за иранската нуклеарна програма.
– Ќе биде грешка да се напушти Договорот за нуклеарната програма и да се отстранат ограничувањата за Иран, наведе Џонсон.
И германската канцеларка и францускиот претседател, Ангела Меркел и Емануел Макрон исто така апелираа Трамп да не се повлекува од Договорот со Иран.