Американскиот претседател Доналд Трамп го смени советникот за национална безбедност Мајк Волц и го назначи државниот секретар Марко Рубио за негов привремен заменик, што е првата значајна промена во внатрешниот круг на Трамп откако тој ја презеде функцијата во јануари.
Трамп во објава на социјалните мрежи изјави дека ќе го номинира Волц за амбасадор во Обединетите нации, додавајќи дека тој „работел напорно за да ги стави интересите на нашата нација на прво место“.
Претходно истиот ден, извори изјавија дека Трамп одлучил да го отстрани Волц од неговата позиција во Белата куќа, а како опција за оваа позиција се споменуваше специјалниот пратеник Стив Виткоф, задолжен за дипломатијата со Русија и Украина и Блискиот исток.
Изборот на Трамп за Рубио како замена за Волц е привремен и ќе биде првпат од Хенри Кисинџер во 1970-те едно лице да ги извршува функциите државен секретар и советник за национална безбедност. Советникот за национална безбедност е моќна улога која не бара потврда од Сенатот.
Заменикот на Волц, Алекс Вонг, експерт за Азија, кој беше задолжен за Северна Кореја за време на првиот мандат на Трамп, исто така ја напушта Белата куќа, изјавија две лица запознаени со ситуацијата.
Волц, 51-годишен републикански пратеник од сојузната држава Флорида, се соочи со критики откако случајно додаде новинар во група на Signal каде што високите безбедносни функционери дискутираа за бомбардирањето во Јемен.
За тој инцидент одговорноста ја презема Волц, велејќи дека зад безбедносниот пропуст поврзан со американските напади во Јемен тој самиот ја презема одговорноста откако новинар бил вклучен во групата на платфомата Signal којашто тој ја оформил. Валц тогаш сугерираше дека е можно да има снимен телефонски број на новинарот за кој мислел дека е на некој друг. Белата куќа тогаш соопшти дека нема протечени никакви доверливи информации кога планот за напад врз Хутистите во Јемен по грешка бил споделен со новинарот, а Трамп рече дека неговиот советник го научил урокот.