Додека песната „Бог да ја благослови Америка“ одекнува низ балската сала во Мар-а-Лаго, голем број поддржувачи на поранешниот американски претседател Доналд Трамп навиваа пред замокот. Оваа сцена потсетува на повеќето негови митинзи, но сега околностите се сосема поинакви.
Во текот на кариерата тој беше се, од ријалити ѕвезда до претседател на најмоќната земја, но никој не го видел како вчера.
Само шест часа пред да пристигне пред судот во Њујорк, Доналд Трамп парадираше низ улиците на Флорида од неговата палата до аеродромот каде што се качи на приватен авион за Њујорк.
Тој намерно избра да не се појави пред камерите на Менхетен. Во судницата се изјасни за невин по 34 точки од обвинението, меѓу кои и фалсификување деловни податоци.
Тој ги потврди своите зборови во говорот по слетувањето на Флорида. Намрштениот израз на лицето за време на престојот во судницата го замени со пркосен, а обвинувањата против него ги нарече смешни.
„Никогаш не мислев дека вакво нешто може да се случи во Америка. Единственото злосторство што го направив е бестрашно да ја бранам нашата нација од оние кои сакаат да ја уништат“, им рече Трамп на приврзаниците собрани во неговиот дом во Мар-а-Лаго во Пал Бич, Флорида.
Тој ја критикуваше работата на обвинителството, но не повика на нови протести на неговите поддржувачи, пишува Sky news.
Судијата Хуан Меркан, кој го води случајот против Трамп, му рече на поранешниот претседател да внимава на неговата реторика. Сепак, и покрај сите овие предупредувања, се чини дека Трамп не обрна премногу внимание на неговите зборови.
Тој гневно му се нафрли и на адвокатот кој го гони случајот, нарекувајќи го негативец и полуден психопат.
Трамп особено ја критикуваше работата на специјалниот советник Џек Смит во врска со истрагата за случајот со доверливи документи, кои беа донесени во Мар-а-Лаго откако Трамп ја напушти Белата куќа на почетокот на 2021 година, и кого неколкупати го нарече „лудак“.
Следеше тирада за другите истраги со кои се соочува, рацијата во Мар-а-Лаго која откри доверливи документи, истрагата во Џорџија за мешање во изборите во 2020 година и наводите дека тој поттикнал насилство во Капитол на 6 јануари 2021 година.
Некои се прашуваа дали претходно го виделе Трамп во вакво издание. Ако желбата на Трамп е да ја поткопа довербата во американските институции, овој говор беше токму во таа насока.
„Не можат да не победат на гласачката кутија, па се обидуваат да не победат преку законот. Тоа е земјата во која живееме во моментов, САД се во хаос. Не се сомневам дека ќе ја направиме Америка повторно голема “, рече Трамп.