Доналд Трамп во предизборната кампања ја помина секоја педа од Америка, патуваше илјадници километри, но генерално никаде не се задржуваше повеќе од ден-два. Објаснувањето е едноставно – човекот обожува да спие во сопствениот кревет.
Буквално ги излуди своите пилоти и останатиот персонал кои секојдневно мораа да го враќаат во Њујорк.
Новиот претседател веќе седум дена e, на за него досега непознат терен, во Белата куќа. Како се снаоѓа?
Ако се суди по извештајот на „Њујорк Тајмс“, заклучокот е дека не му е воопшто лошо. Дури и неговите соработници се грижеле како ќе успее да живее надвор од Њујорк, но после една седмица ситуацијата изгледа надежно. Трамп делува задоволно, дури и восхитено:
„Што најмногу ме воодушевува? Телефоните! Тоа се најдобрите телефони кои некогаш во животот сум ги користел. Зборовите сами излегуваат од мене“, изјави Трамп во едно интервју, објаснувајќи дека никој не ги прислушува или снима неговите разговори.
А, како изгледа еден обичен ден во новиот живот на Доналд Трамп? Станува од кревет нешто пред шест часот и прво што прави гледа телевизија. Откако ќе ги изгледа сите утрински вести, појадува во Западното крило и ги прелистува весниците, а во исто време објавува нешто на „Твитер“. На неговата маса се „Њујорк Тајмс“, „Њујорк Пост“ и „Вашингтон Пост“.
Неговите состаноци почнуваат околу 9 часот, многу порано отколку што беше навикнат и тука лежи најголемата промена во неговиот живот. Тоа време секогаш било резервирано за неговата омилена преокупација – гледање телевизија.
Сепак, како што наведува „Њујорк Тајмс“, слободното време во вечерните часови му овозможува повеќе време за седење пред ТВ екранот. Книги не сака да чита, така што…
Попладнето му е резервирано за потпишување нови одлуки во Овалната соба за состаноци во Западното крило. Токму од Овалната соба и е најмаѓепсан. Понекогаш седи сам во неа, само ја гледа просторијата и и’ се восхитува.
„Понекогаш го викам семејството и соработниците. Сите влегуваат внатре и само гледаат и се восхитуваат“, изјавил Трамп.
Сите поранешни претседатели имале најмногу замерки на фактот дека понекогаш со денови биле затворени во Белата Куќа. Најмногу се бунтувал Џорџ Буш помладиот, кого ѕидовите го излудувале и кој најмногу сонувал свеж воздух.
Но, кога е Трамп во прашање, тука нема никакви проблеми. Неговите соработници тврдат дека тој може со денови да издржи без да излезе надвор од зградата. Со години живееше во пентхаус на 58. кат во Трам Тауер, а канцелариите му беа на 26. кат.
Трамп потврди дека ужива во неговиот нов дом иако бил прилично лут поради коментарите после неговата инаугурација. Неговиот портпарол се обиде да ги поправи работите, но на крајот се’ заврши со најбизарната прес конференција во историјата на Белата Куќа.
Иако во „Трамп Тауер“, претседателот на Америка, имаше цела војска на послуга, со себе во Белата Куќа не донел никој. Новинарите пишуваат дека немал никакви замерки, па дури и бил задоволен со храната.
Целото негово семејство било воодушевено кога утрото после инаугурацијата ја здогледале шведската маса полна со разни специјалите, а вработените се потрудиле да се најдат и некои посебни десерти кои Трамп ги сакал.
„Ова е прекрасна куќа, многу елегантна. Да знаете само како се чувствувам кога спијам во истата соба, во која некогаш спиел Абрахам Линколн“, изјавил Трамп и заклучил:
„Секако дека се е различно, но јас сум среќен. Ова е чиста елеганција, ова е историја“!