Една третина од испитаниците во Македонија кои одговарале за Барометарот на глобалната корупција за 2016 година, сметаат дека таа е еден од трите најзначајни проблеми со кои се соочува државата а на кои треба да работи Владата.
Во најголем дел, испитаниците платиле поткуп за обезбедување на услуги во здравството, при вадењето на службени документи како и во случаи со сообраќајната полиција.
Сепак, за потенцирање е дека граѓаните сметаат дека најкорумпирани во Македонија се пратениците од Законодавниот дом.
Но она што ги плаши граѓаните да пријават корупција се последиците, а многумина при истражувањето одговориле и дека корупцијата била тешка за докажување и не верувале дека ќе направат промена.
Образложувајќи го Глобалниот барометар на Транспаренси Интернешнл за корупција, Слаѓана Тасева од ТИ-Македонија потенцираше дека политичката корупција во Македонија е постојано присутна, особено при финансирањето на партиите.
– Политичката корупција е постојано присутна. Во формите во кои таа најчесто се јавува за време на избори, е во финансирањето на изборните кампањи, каде што постојано практика е финансирањето на кампањите да се спроведува преку поединци или компании кои после изборите сакаат да имаат влијание или учество во начинот на кој ќе се водат политиките. Помоќните овде предвремено инвестираат, изјави Тасева.
Според неа ова се случува бидејќи недостасува транспарентен систем за да се знае кој и како ги финансира кампањите, а не се објавуваат ниту изворите на донации.
Глобално земено, Барометарот на ТИ заклучува дека еден од тројца луѓе кои живеат во Европа и Централна Азија сметаат дека корупцијата е еден од најголемите проблеми со кои се соочува нивната земја, а оваа бројка расте на двајца од секои тројца жители во Молдавија, Шпанија и Косово.
Речиси една третина од жителите на регионот веруваат дека нивната влада и законодавците се многу корумпирани, а мнозинството од луѓето велат дека нивните власти не прават доволно за да ја сузбијат корупцијата.
Повеќе од половината жители на земјите на Европската Унија (ЕУ) (53%), земјите кандидати за членство во ЕУ (53%), Заедницата на независни држави (ЗНД) составен главно од поранешни држави од Советскиот Сојуз (56%), велат, нивните држави не успеале да ја спречат корупцијата.
Властите во Украина (86%), Молдавија (84%), Босна и Херцеговина (82%) и Шпанија (80%) се најниско оценети од страна на нивните граѓани.
Барометарот е изготвен врз база на 60.000 испитаници во 42 држави во Европа и Централна Азија во врска со нивните искуства со корупцијата во нивниот секојдневен живот за новиот извештај „Луѓето и корупцијата: Европа и Централна Азија“, кој е дел од Глобалниот барометар за корупција за 2016 година.
Транспаренси Интернешнл дава четири клучни препораки за намалување на политичката корупција и помагање на луѓето да пријавуваат без страв од одмазда. Владите ширум Европа и Централна Азија треба, да имаат транспарентни услови за лобирање на јавен регистар на лобисти со што ќе се олесни надзорот над политичките одлуки; да ја обезбедат независноста на судството, особено во земјите кандидати за членство во ЕУ и земјите од ЗНД преку намалување на влијанието на извршната власт врз судството и обвинителството и преку објективни и транспарентни системи за назначување, преместување или разрешување на судии и обвинители; да усвојат и спроведат опсежна легислатива за заштита на укажувачите и да ги поддржат укажувачите и пријавувачите на корупција и да обезбедат соодветно проследување на она што го откриваат.