Министерката за труд и социјална политика Јованка Тренчевска денеска оствари протоколарна средба со амбасадорката на САД Кејт Мари Брнз.
На средбата, двете соговорнички се осврнале на веќе воспоставената добра меѓусебна соработка и за нејзиното унапредување, како и на актуелната состојба во Украина.
„Како човек кој го застапува почитувањето на човековите права го осудувам секое загрозување на човековите права и секој напад врз сувереноста на една држава. Ставот на Владата на Северна Македонија е дека сувереноста на државата треба да биде заштитена и дека каков било напад врз држава, во случајот Украина е за секаква осуда. Како Министерство имаме главна улога во делот на процесот на подготовка за прифаќање на граѓани од Украина кои ја напуштаат својата држава, во делот на обезбедување на соодветен престој, заштита и поддршка во периодот додека трае ваквата состојба во Украина. Со информација, Владата ќе ја информираме за можностите кои ги има Министерството за труд и социјална политика и за капацитетите со кои располагаме. Ќе информираме за колкав број на бегалци и граѓани на Украина кои ја напуштаат својата држава ќе можеме да им обезбедиме поддршка и помош, овде во нашата држава“, рече Тренчевска.
Амбасадорката Брнз посочила дека заканата за Украина од Русија е закана за демократските вредности насекаде во светот.
Министерката Тренчевска ја информирала амбасадорката за политиките и предизвиците на Министерството во областа на човековите права, повисок животен стандард, во делот на реализирањето на социјалните реформи, имплементирањето на мерките од Оперативниот план, за Законите за родова еднаквост, за вработување на лицата со попреченост и за Законот за работни односи, за поголемо учество на жените во политиката, за Стратегијата за инклузија на Ромите.
Тренчевска се заблагодарла на поддршката што нашата држава ја добива од САД и ја информирала амбасадорката, дека мерките за самовработување и обуки даваат одлични резултати, кај младите, жените и лицата со попреченост, бидејќи овозможуваат нивно активно вклучување на пазарот на трудот.