При изградбата на коридорите 8 и 10д најмалку 51 отсто компании, работници и останати ресурси ќе бидат ангажирани од земјава, односно домашни работници и домашни компании, изјави министерката за труд и социјална политика Јованка Тренчевска на денешната собраниска седница посветена на пратенички прашања.
Одговарајќи на пратеничко прашање од Бојан Стојаноски од ВМРО-ДПМНЕ, таа истакна дека во Договорот со „Бехтел и Енка“ стои дека најмалку 51 отсто од компаниите, работниците, работната сила и други ресурси при изградбата ќе бидат ангажирани од државата.
Во делот на работното време и прекувремената работа на работниците, Тренчевска рече оти „никаде не стои дека работниците ќе бидат ангажирани 12 часа, односно 72 часа“. – Никаде не стои 60 часа неделно, нагласи министерката Тренчевска.
Во однос на најавите за синдикален протест на 1 Мај и тврдењето дека Синдикатот, како што рече, „бил на нозе“, министерката обвини дека ВМРО-ДПМНЕ создава хаос во општеството со лажни вести и манипулации.
Она што е вистината е дека Владата, МТСП и јас како министерка за труд и социјална политика ќе ги заштитуваме правата на работниците. Ќе ги штитиме правата на работниците и ќе се почитува секој закон што се однесува на првата на работниците, рече Тренчевска.
Таа образложи дека од компаниите кои ќе ангажираат работници за изградба на коридорите 8 и 10д ќе биде испочитувана одредбата за дневна пауза на работниците и за неделен 24-часовен одмор.
Се додека ја манипулирате јавноста и излегувате со лажни вести ќе создавате хаос во државата. Правата на работниците од оваа Влада се заштитени токму со Законот за работни односи. И понатаму Владата и МТСП ќе ги штитат правата на работниците и нема да дозволат ниту едно право да биде злоупотребено, истакна Тренчевска.
Таа додаде дека се работи за проект кој е од стратешки и национален интерес, потенцирајќи дека прекувремената работа на работниците ќе биде платена и која ќе биде дозволена само со писмена изјава и согласност од работникот.