Грижата за граѓаните, заштитата, поддршката во секој период во животот, но и при секој предизвик е приоритет на Владата на Република Северна Македонија, а вложувањето во човечкиот капитал за нас не е празна флоскула, туку цел на која посветено работиме, кажа претседателката на Форумот на жени на СДСМ и министерка за труд и социјална политика Јованка Тренчевска на трибината „Резултати што прават разлика“ во Кавадарци.
-За нас грижата за поединецот е грижа која започнува од раѓање, предучилишно воспитување, вработување и интеграција на пазар на труд, па се до пензионирање. Секој граѓанин има посебна приказна исполнета со различни предизвици, а токму системот на социјална заштита е оној кој е креиран да биде флексибилен и да одговори на секоја индивидуално барање од него. Социјалдемократскиот сојуз на Македонија јасно покажа посветеност и грижа за граѓаните со формирањето на Влада во 2017 година. Големата реформа во социјалната заштита во 2019 година и зголемувањето на правата од социјална заштита за речиси 100%, а ГМП за 300%. Реформата на системот за социјална заштита е обележана од процесот на деинституционализација. Согласно Националната стратегија за деинституционализација (2018-2027), големите и гломазни установи за сместување на деца лица со попреченост, деца без родителска грижа и деца во судир со законот и деца во ризик се трансформираа во живеење во заедница со 24 часовна поддршка, истакна Тренчевска.
Таа додаде дека согласно со реформата на системот за социјална заштита од 2019 година и процесот на деинституционализација, воспоставени се 74 станбени единици за живеење со поддршка.
-Тоа значи опфат на 275 лица со попреченост во станбени единици. Во делот на поддршка на згрижувачките семејства како нова форма за првпат е предвиден Центар за поддршка на згрижувачки семејства кој треба да врши промоција на услугата згрижување во семејство. Од 2021 до 2023 се отворени 3 вакви центри: Детскиот дом „11 Октомври„ Скопје , Домот за доенчиња и мали деца во Битола на СОС Детско село и да ја обезбедуваат поддршката на згрижувачките семејства на цела територија на нашата држава. Овие центри вршат промоција на услугата згрижување на семејство, проценка, обука на идните згрижувачки семејства, како и следење и давање на поддршка на постојните згрижувачки семејства. Во моментот во нашата држава има 360 згрижувачки семејства во кои се згрижени 608 деца, а знам дека можеме уште повеќе. До 2017 година згрижувачите примаа помош од државата од 6250 денари за едно згрижено лица додека денес во 2023 година изнесува 18.112 денари, информира Тренчевска.