Сараево: Полицијата и надлежните служби пронашле 31 дете во куќа во Брчко, Босна и Херцеговина.
Според порталот Кликс.ба (Klix.ba), децата имале хрватски пасоши, а три лица се уапсени поради сомнение дека сториле повеќе кривични дела меѓу кои и трговија со луѓе.
Како што соопштија од окружната полиција Брчко, преземајќи активности од нивна надлежност, полициски службеници вчера, под надзор на Окружното обвинителство Брчко на БиХ и во соработка со Одделот за социјална заштита и Црвениот крст, пронашле поголем број деца и ги однеле на безбедно место.
Во рамки на досегашните активности, уапсени се три лица поради основано сомнение за сторени кривични дела трговија со луѓе, трговија со деца и запуштање или злоупотреба на деца. Истрагата за инцидентот е во тек, се наведува во соопштението.
Имајќи ги предвид законските одредби за постапување во кривични предмети против сторители на кривични дела против деца и малолетни лица, како и универзалните права на детето, потсетуваме на обврската за постапување со особена внимателност со цел избегнување натамошни штетни последици и заштита на интересите на детето, соопшти полицијата.
Меѓу нив имало и деца под една година.
Децата ги чувала жена, најверојатно италијанска државјанка. Со неа е уапсен и државјанин на БиХ заедно со нејзиниот син.