За 23,6 отсто пораснала трговската размена помеѓу Северна македонија и Германија минатата година.
Ова беше истакнато на денешниот настан „Очекувањата на приватниот сектор од новата Влада во време на корона и енергетска криза“.
Директор на Делегацијата на германското стопанство во Македонија, Патрик Мартенс истакна дека во 2021 година била постигната рекордната трговска размена помеѓу двете земји, со вредност од 4,7 милијарди евра.
„Минатата година имаше и проширувања на инвестициите кај повеќе германски инвеститори во земјата од автомобилската индустрија. Некои од постоечките компании треба да ги прошират своите производни капацитети да вработат нови лица за да ги постигнат сите оние нови побарувања коишто ги имаат добиено од нивните клиенти. ‘Вебхелп’ и ‘Мажорел’ се две нови компании, две нови инвестиции во државава коишто се од областа на услужната дејност и корисничкото искуство – кол-центри и кои се, големи интернационални работодавачи. Тие работат со клиенти на пазарите во Европа и во Америка, и ќе отворат голем број работни места и тоа добро платени работни места за граѓани со високо образование кои имаат познавање на јазици“, рече Мартенс.
За германската амбасадорка Анке Холштајн, доверливата клима на соработка со македонската Влада е важно признание за квалитет за локацијата Северна Македонија.
„Заедно ќе продолжиме да ја негуваме – за успешно да работат тие што се веќе овде, како и за понатаму да ја рекламираат Северна Македонија како добра дестинација за инвестиции“, рече амбасадорката Холштај.
Премиерот Димитар Ковачевски рече дека германските инвестиции, како и европските се клучни за нашата земја.
„Во Европа може да се произведуваат многу работи, а тоа значи и заштеда на трошоците. Северна Македонија тоа ќе го искористи и затоа правиме амбиент за нови инвестиции. Ние сме членка на НАТО, нашата позиција е и членство во Европската Унија, за инвеститорите да знаат дека имаат сигурност и предвидлив деловен амбиент, впрочем тоа е нашата предност и во однос на некои од земјите од регионот“, изјави Ковачевски и додаде дека Владата во партнерство со сите релевантни чинители за да се спречи ценовниот шок предизвикан од светската енергетска криза, брзо и навремено, донесе пакет од 26 мерки во вредност од 400 милиони евра за да се амортизираат притисоците врз стандардот на граѓаните и да се обезбеди ликвидност на компаниите.
Настанот беше во организација на Делегацијата на германското стопанство во Северна Македонија и Македонско-Германското стопанско здружение.