Судењето за случајот „Триста“ против поранешниот помошник министер за внатрешни работи, Ѓоко Поповски беше одложено за 28 декември.
На денешното рочиште требаше да биде сослушан докторот кој му ја издал дијагнозата на Поповски како и независен судски вештак од областа на психијатријата со цел да се утврди дали обвинетиот може да ги следи судските рочишта.
Поради заштита на правата за приватност на обвинетиот, произнесувањето на докторите беше направено зад затворени врати. Како што информираше подоцна судијката Лидија Петровска, Поповски на денешното рочиште доставил и ново боледување.
Докторите побарале дополнително време со цел да ја проучат медицинската документација на Поповски, за да можат да дадат исказ.
Досега судењето беше одлагано два пати, бидејќи Поповски не доаѓаше во судот, а како причина за неговото отсуство се наведуваше неговата влошена здравствена состојба. На последното рочиште на кое присуствуваше Поповски, неговиот адвокат Боро Тасевски потенцираше дека обвинетиот дошол во судницата само заради сомневањата во врска со неговата здравствена состојба.
Поповски се сомничи дека го оштетил буџетот за 453.570 евра. Според СЈО, Поповски незаконски доделил договори за купопродажба и одржување возила на Порше Македонија ДООЕЛ Скопје, Ка-Дис ДОО Скопје, Бохемија Автомобили Роус ДООЕЛ Скопје, Колевски ДОО Скопје и Авто Куќа ДОО Скопје избрани како економски најповолни понуди.
Во овој предмет, Апелацискиот суд одлучи дека прислушуваните разговори може да се користат како доказен материјал.