По денешниот распит во Кривичниот суд на шестмината пратеници, тројца добија мерка притвор во траење од 30 дена, а на другите тројца судија на претходна постапка им определи мерка домашен притвор.
Пратениците Љубен Арнаудов, Крсто Мукоски и Сашо Василевски попладнево во придружба на полициски службеници, го напуштија Кривичниот суд, и беа внесени во полициски комбиња. А пратениците Жаклина Пешевска, Јохан Тарчуловски и Љупчо Димовски ќе останат во домашен притвор.
Распитот на пратениците траеше неколку часа. Тие одделно дојдоа во судот, а куса изјава за медиумите пред влегувањето даде само пратеникот Мукоски, кој рече дека правно гледано, според него, нема аргументи за притвор, но, како што наведе, остава на судот да одлучи за тоа и верува во него.
Шесттемина пратеници пред судот ги пречекаа и неколкумина нивни колеги од пратеничката група на ВМРО-ДПМНЕ за да им изразат поддршка.
Овие пратеници се дел од 36-те лица кои Основното јавно обвинителство ги гони за „терористичко загрозување на уставниот поредок и безбедноста“, во врска со настаните од 27 април годинава во Собранието на Република Македонија.
Во петокот, Собранието на Република Македонија им го симна имунитетот, а известувањето до Кривичниот суд од Парламентот пристигна вчера по што тоа беше доставено на надлежните судии на претходна постапка, со што се создадоа услови да се постапува по предлогот на обвинителството.