Јануарските пензии што ќе бидат исплатени на 324 000 пензионери во земјава ќе бидат поголеми за 722 денари. Ова го истакна вицепремиерката за економски прашања Мила Царовска која образложи дека покачувањето се должи на стабилизација на пензискиот систем во изминатите две години, реформа со која, како што рече, се заштедени повеќе од 3,7 милијарди денари.
„Покачувањето, секако, се базира и на приходите кои се зголемија кај работоспособното население и минималната плата која само во минатата година се зголеми за 15 отсто, а просечната плата за 5 проценти. Законски се утврди трето дополнително усогласување на пензиите во нашата држава за сите пензионери со зголемувања од вкупно пет проценти. Со ова добиваме просечна од 15,500 што е за 1,746 денари повеќе за разлика од пред две и пол години“, рече Царовска.
Таа додаде дека за мерката за субвенционирање на придонесите за раст на платите Владата издвоила 2,4 милијарди денари во буџетот на МТСП наменети за пензискиот и за здравствениот фонд.
Царовска одговори дека покачувањето не е популизам пред избори туку се должи на позитивните показатели од реформата за стабилизирање на пензискиот систем. Резултатите биле видливи во јуни и тогаш, како што нагласи „далеку од изборите“, утврдиле дека по сите параметри пензионерите со новиот буџет може да добијат покачување до нивото на раст на просечната плата.
Директорот на Фондот за пензиско и инвалидско осигурување, Шаип Зенељи соопшти дека во земјава има околу 580.000 осигуреници, а соодносот е 1,8 вработени на еден пензионер. Царовска додаде дека Фонд може да достигне нула дефицит, односно да биде целосно самоодржлив кога соодносот би бил тројца врабиотени на еден пензионер. Смета дека сегашниот дефицит може да се преполови и да се постигне постабилна состојба од сегашната ако понатаму се работи на придонесите и на бројот на вработени во реалниот сектор.
Претседателката на Сојузот на здруженијата на пензионерите, Станка Трајкова ја поздрави одлуката и рече дека со зголемувањето се подига вредноста на просечната пензија во државата.
„Зголемувањето најмногу оди во прилог на корисниците кои примаат до просечниот износ на пензија, а тоа се околу половина од вкупниот број на пензионери“, рече Трајкова.
Во оваа пригода таа побара и проширување на позитивната листа на лекови зашто плаќањето лекови што не се на листата негативно се одразува на пензионерскиот буџет.