Освен цените на храната, вивнаа и оние на горивата кои од ноќеска на полноќ се продаваат по околу 100 денари за литар, со што го достигнаа плафонот. Граѓаните се прашуваат дали и кога Владата повторно ќе донесе нов пакет мерки со кои ќе го ублажи барем малку ценовниот шок. 

Основните прехранбени артикли осамнаа денес со нови, повисоки цени – зејтинот се продава по 155, но и по 164 денари, белиот леб е 40 денари, млекото 65, брашното 58. Во некои маркети вработените се уште ги ставаа новите цени на артиклите, бидејќи од денеска веќе не важат антикризните мерки со кои беа  ограничени цените на основните прехранбени артикли. Тоа значи дека тие повеќе нема да се продаваат со нула проценти ДДВ, а од денеска и ДДВ-то за бензините се враќа на 18 проценти.

– Потрошувачката денеска е вообичаена, важно е дека ги имаме сите артикли, дека нема празни рафтови. Поголема навалица имаше вчера попладне и синоќа, дел од купувачите ги набавуваа основните намирници по стари цени. Зејтинот денеска, на пример, е поскап за околу 20 денари, ни изјавија во еден маркет, кој е дел од познатиот синџир маркети во Скопје.

Нови, повисоки цени за најмалку 5 отсто ќе има и за месото, јајцата, белиот шеќер, млеко и павлака, бел ориз.

Освен цените на храната, вивнаа и оние на горивата кои од ноќеска на полноќ се продаваат по околу 100 денари за литар, со што го достигнаа плафонот. Според новите цени, Еуросупер БС-95 се продава за 104 денари, Еуросупер БС-98 за 106,5 денари за литар, дизелот за 95 денари, а Екстра лесното масло за домаќинство за 93 денари.

Граѓаните се прашуваат дали и кога Владата повторно ќе донесе нов пакет мерки со кои ќе го ублажи барем малку ценовниот шок, бидејќи  Владата на вчерашната седница не усвои нови антикризни мерки.

На прашањето ќе има ли и кога нов сет мерки, од Владата за одговор упатуваат на Министерството за финансии – дали и колку финансиски средства за оваа намена се планирани со ребалансот на Буџетот, кој е во собраниска процедура.

За тоа дали наскоро ќе предложат некоја нова антикризна мерка или ограничување на маржата од Министерство за економија изјавија:

– Немаме ништо повеќе да кажеме освен ставот од Владата. Во надлежност на Министерство за економија беа маржите, а министерот уште пред една недела кажа дека таа мерка нема да се продолжи. За останатите мерки во Министерство за финансии и во Влада, изјавија од ова Министерство.

Со ребалансот „инфузија“ од 76 милиони евра за нови антикризни мерки.

Министерот за финансии Фатмир Бесими, пред пет дена на  заедничката прес-конференција со евроамбасадорот Дејвид Гир, нагласи дека очекува Собранието во наредните денови да закаже пленарна седница за ребалансот.

„Со ребалансот се дава одговор на кризата. Мерките што се најавени, се гледаат. Зошто одиме со овој ребаланс и што сакаме да постигнеме – требаше да се адресираат сите потребни прашања меѓу кои и дополнителни средства за кризата за мерки за ранливите категории, кои ќе бидат привремени зависно од потребите, но и да се одржат политиките што ќе значат зачувување на растот. Бидејќи трошоците значително се зголемија и дефицитот се зголемува за 150 милиони евра. При тоа со ребалансот има и околу 13,4 милијарди денари кратења, но во исто време има и додавања”, истакна Бесими.

Тој потенцира дека тоа што е ставено во Предлог – ребалансот на буџетот, се очекува и да се реализира.

Зголемувања, потенцира Бесими, има во социјалата и земјоделството, а предвидени се и 76 милиони евра за антикризни мерки.

Љубица Балабан