Екстремно студеното време во Северна Америка се должи на феноменот наречен „циклонска бомба“, пренесе АФП.

Националната метеоролошка служба на САД соопшти дека овој „настан кој се случува еднаш во генерација“ може да стане смртоносен и веќе ги собори рекордите за студено време. Температурите се намалуваат до минус 53ºC во Западна Канада, -38ºC во Минесота и -13ºC во Далас.

Снег врне дури и во суптропската северна Флорида.

Циклонската бомба е бура која брзо се засилува и се јавува кога воздушниот притисок опаѓа за 20 или повеќе милибари во рок од 24 часа.

Ова обично се случува кога топла воздушна маса ќе се судри со студена, објави Националната управа за океани и атмосфера.

Овојпат, воздухот од Арктикот се судри со тропскиот воздух од Мексиканскиот Залив, формирајќи вдлабнатина која донесе дожд и снег.

Она што ја прави оваа бура извонредна е колку брзо падна притисокот – 40 милибари за 24 часа, според метеорологот Јан Амис.

„Ова доведе до развој на екстремни услови за невреме“, рече Сирил Душен, метеоролог од францускиот метеоролошки канал.

Невидената природа на оваа бура доаѓа од интензитетот и екстремите на нејзините ниски температури, рече Душен.

„Тоа е она што ја прави извонредна“, рече тој.

Бурата предизвика „пад на поларниот вител“, каде што особено студената воздушна маса од Арктикот се протера на југ во пониски, потопли географски широчини.

Како резултат на тоа, температурите паѓаат – на пример, во Денвер, температурите се намалија за 33ºC за само седум часа.

Националната метеоролошка служба на САД предупреди дека таквиот студ може да доведе до смрзнатини на изложената кожа за неколку минути, хипотермија, па дури и смрт доколку некое лице е изложено на овие услови предолго.

Ова го прави секое патување „опасно“, па дури и „невозможно“, додаде таа.